隨著靈異喜劇《靈戲逼人》劇情發展，日夜同「女鬼」阿芳( 龔嘉欣 飾)出雙入對嘅Ivan( 張振朗 飾)，自與同女友Karen( 蔚雨芯 飾)分手後，不知不覺間對阿芳漸生情愫，星期五晚嘅一集，Ivan臨睡前欣賞過阿芳表演嘅K-pop熱舞，之後仲夢見阿芳大跳Sexy Dance，再風情萬種下跳上Ivan大髀咬耳仔，場面香艷又搞笑。
繼《新四十二章》Lisa上身跳勁舞後，嘉欣今次再次挑戰K-pop，雖然同樣以搞笑為主，不過風格就由有型變成性感。講到呢場戲，嘉欣就淨係傻笑嚟拍攝情況：「拍嗰陣最難係忍笑，我哋有同導演研究呢場戲誘惑同放電嘅尺度，例如係咪要撥吓頭髮咁，但最終都係大家不停係咁笑。」
而繼上周 阮嘉敏 同 劉芷玲 之後，今個星期亦再有年青演員彈出，佢就係飾演阮浩棕好友傑仔嘅 吳子冲 喇。前晚一集傑仔因被好友阿東( 阮浩棕 飾)誤解退出戲班，深感不捨嘅傑仔同若琳( 阮嘉敏 飾)訴苦期間，憶起當日摯親離世時阿東安慰同陪伴自己，解釋咗傑仔點解願意為阿東默默付出。
原來呢場戲係子冲入行五年來首次爆喊戲，佢喺社交平台上載劇照同留言話：「對於喊戲，我係完全冇信心，當時真係冇諗過可以喊到鼻水都出埋嚟，橫隔膜又抽筋。」又因為角色單純、善良又思想正向，仲喺網上吸收唔少正評，讚爆喊場面感動之餘，亦大讚子冲嘅演繹。
子冲就話接到劇本一知道要拍喊戲已經擔心同緊張，拍攝前仲刻意黑足24小時面同「與世隔絕」；談到拍攝感受，子冲就話最難之處係講對白喇：「自己睇返出街係覺得唔係做得十分好，喊戲真係好難，難在喊得出只係第一步，然後我發現原來喊住講嘢係好難，因為條氣會抽搐，好易會好似口齒不清咁，希望下次可以講清楚啲對白。」
子沖仲話感激媽咪陪自己睇咗呢幕兩、三次，依然忍唔住眼濕濕。至於劇中嘅好友阮浩棕，子冲透露其實私下一樣Friend一到不得了，仲喺劇集開拍前已相約齊齊對劇本培養感情；子冲仲話要感激張振朗俾咗唔少貼士：「佢成日叫我唔好諗太多同相信感覺，叫我唔好咁理性。」
子冲又指是次是首度次飾演傻仔，為咗更神似監製亦建議佢戴眼鏡，子冲仲揭曉傑仔長期戴帽之謎：「因為傑仔好想撞鬼，咁人有三把火，咪戴帽遮住一把，加埋個斜孭袋，就成為咗傑仔嘅標誌 。 」
《靈戲逼人》星期一至五晚 20:30 翡翠台