《DM旅導遊》嘅主持 倪嘉雯 同 葉靖儀 繼續集玩轉馬來西亞， 今晚(17號)播出嘅一集，就邀請咗有「大馬陳嘉桓」之稱嘅 黃燕平 為佢哋擔任導遊喇， Adeline嘅IG逾12.1萬，亦係坐擁71萬平台訂閱嘅「低清Dissy」旗下KOL之一。
平時以文青style見人嘅Adeline，帶住Carmen同Michelle閒遊音樂私竇Café、名信片店同品嚐 特色拉花中式糖水；又帶佢哋去凌晨都營業嘅潮牌店揀靚衫，Michelle唔止喺鋪頭打卡位大曬長腿影靚相，仲搞笑吩咐Carmen要影出身高「1.9米」嘅長腿效果。
雖然Carmen同Michelle都係90後，Carmen亦只比Michelle年齡大三年，但喺節目中Michelle就連環取笑Carmen「老」，先係笑指卡式錄音帶屬於Carmen嘅年代，之後又指Carmen適合年長女士穿著嘅「娘惹服」。
不過Michelle受訪時，就解釋一切都只係節目效果，不過亦話Carmen私下確實有啲「老人家」︰「都係friend先會咁玩，我同Carmen合作《晚間聽聞》時，已經成日笑佢係清朝人，佢諗嘢比較保守，同埋好注重養生。」
而Carmen受訪時，就同Michelle一樣話只係節目氣氛︰「都慣咗畀人叫『婆仔』，平時我會飲暖水，去到大馬咁熱，都會有件褸跟身出入冷氣地方。防曬、遮同風扇係我必備三寶，另外我隨身仲有止痛藥、腸胃藥同蚊膏以備不時之需，所以每日出街都一大袋嘢，成日畀佢哋笑。」
而聽晚(18號)播出嘅第7集節目，就會有「娘惹女神」 劉潔琳 為大家介紹娘惹文化、服飾同飲食。Michelle同Carmen仲會穿着娘惹服行街，又即學即用馬來西亞話講價。呢集介紹嘅美食亦相當吸引，除咗幾款娘惹人至愛嘅勁辣臭豆腐同娘惹菜廚師發辦。
為咗答謝觀眾支持，今晚 23:00 Carmen、Michelle仲會同埋Adeline一齊喺開IG Live https://www.instagram.com/j2_channel/ ，冋大家互動大談拍攝趣事呀。
《DM旅導遊》 星期一至五晚 22:30 J2