同觀眾一齊拜訪香港各區老店貓明星嘅 J2 節目《他和她的喵店長》嚟到最後五集，今個星期製作組走訪九龍城、官涌/佐敦、深水埗、港島東、新填地街及廣東道，拜會妹妹、噹噹、花花、嘉嘉、Elsa、吉吉、牛牛、多士、Buzz 等一眾「貓明星」。
節目繼續由初試「聲音導航」嘅 Gigi炎明熹 繼續帶大家探討暖心故事，而17號播出嘅一集，就有屬於喺1967年經營至今嘅鞋店店主郭小姐嘅故事。當中佢娓娓道出自己點解喺中六畢業後，願意放棄自己興趣去繼承父業嘅原因，郭小姐表示：「我爸身體差，我係屋企大姐姐，對落七個全部讀緊書，要有責任。我係樂意幫爹哋手，只係唔係自己喜歡嘅嘢。」郭小姐嘅鞋店有三大貓店長，佢哋都各有特色，其中噹噹有幫客人揀鞋「神力」，現年20歲嘅白貓「妹妹」 就憑龐大身形同萌爆動態贏盡關注。不過原來望落好福氣的「妹妹」，曾因子宮嚴重發 炎一度險死，郭小姐喺節目內憶述當中驚險過程，更以「妹妹」親身經驗呼籲飼主要注意動物絕育問題。
而21號播映嘅完結篇，請嚟街頭貓咪攝影家 Jonas 分享「街拍」見聞，喺2017年就開始喺香港大街小巷影貓嘅Jonas，見證咗各個社區嘅微妙變化。過去六年同各區老舖、街坊建立咗深厚感情，Jonas希望有啲事物如果可以保留嘅就盡量保留，佢感嘆咁話：「如果我個仔我個孫淨係可以喺照片見到呢啲地方，我會覺得好可惜。好多時一個地方嘅情懷，係經歷咗好多歲月，累積落嚟唔單止係建築物，仲有一啲情懷。其實香港仲有好多有愛嘅人。」
《他和她的喵店長》最後五集 星期一至五 20:30 J2 82台
