TVB旅遊節目《請1日假去旅行 珠海篇》本周四、五晚上10點半翡翠台播映，本周播出「珠海篇」，由蔡潔及吳沚默擔任主持，今次兩位閨密自駕遊珠海，負責揸車嘅蔡潔更係首度嘗試「港車北上」。 
噚晚（20 日）嗰集，蔡潔及吳沚默經港珠澳大橋出發去珠海，首站去景山公園，搭纜車登上山頂挑戰坐衝鋒車落山體驗「極速傳說」，落山期間沚默瘋狂尖叫嗌到拆天，蔡潔笑言：「好好玩呀，以為係小兒科，原來咁正㗎喎，但我就嚟聾！」之後二人到珠海食嘢，地膽吳沚默帶蔡潔品嚐地道Brunch， 大歎海鮮腸粉及豬雜益母草湯。 兩人移師北山村體驗嶺南文化，到訪藏喺大宗祠嘅書店，又喺300年嘅木棉樹旁品嚐地道菜式。最特別係村內醫帝廟竟然係一間酒吧，該酒吧飲品融入涼茶元素，別有一番風味。晚上兩人喺夏灣夜市掃街後到鯨鯊館投宿，躺喺帳篷睇大魚游來游去，體驗沉浸式睡眠！
今晚（21 日）播出呢集，蔡潔及吳沚默會合嘉賓徐榮與囡囡「包包」徐心怡一齊玩轉海洋樂園，樂園除咗有企鵝、海象、海豚等動物可以觀賞，仲有碰碰車、過山車等機動遊戲。眾人乘坐13米高「超級猛獁」巡遊整個園區，相當架勢。 兩位靚女翌日大歎「滴蠟」Spa，即係將植物精油融入大豆蠟，再燒熔作按摩原料，蔡潔與沚默選擇青瓜薄荷磨砂Spa，Chill級享受。是集另一亮點，蔡潔與吳沚默穿上旗袍遊斗門舊街，並上演小劇場扮電影《花樣年華》，場面搞笑。
《請1日假去旅行 珠海篇》今晚 10 點半翡翠台播映最後一集