J2（82 台）又有新搞作，全新節目《台灣學呢啲》將由24日起、逢周一至五晚8點半J2（82 台）播映，節目由兩位J2er施焯日（Arthur）、蔡景行（行仔）及林映暉（暉哥）擔任主持。合作無間嘅「行發」，無論喺《關注關注組》或是《見步行步 台灣篇》均以「勇於嘗試 失敗收場」見稱，堪稱「J2實驗擔當」，其中行仔更係「乜都夠膽死」。
今次「行發」夥拍傻大姐暉哥走訪台灣各地學園、嘗試報讀各種特色課程，增廣見聞之餘、「行發」希望藉此打破Loser框框；希望透過親身體驗，顛覆觀眾對教育嘅既有觀念，從而發現原來 「讀書都可以咁好玩」。
周一（24 日）播出第一集係「行發」及暉哥去台灣首間提供殯儀相關課程嘅學校，學習如何為亡者處理身後事，當中包括遺體美容；Arthur及暉哥將以「第一身體驗」穿壽衣及化遺體妝，過程絕不簡單。另外「死亡體驗課」相當特別，課堂以 分組形式進行，行仔及暉哥負責扮演亡者，另外Arthur及暉哥分別體驗「著壽衣」及「化遺體妝」過程。課程會為「亡者」拍攝遺照及叫佢哋寫定遺書，更有瞓棺材及封棺等不同體驗。
行仔及暉哥按照課堂進程讀出遺書內容，行仔邊讀邊爆喊向家人道歉，事後更坦言「道歉很難」：「我其實冇咩做錯嘅嘢，淨係覺得做唔到人哋（家人）想我做嘅嘢，想同佢哋Say聲 Sorry，但要講出嚟係有啲難度。」暉哥自認眼淺，喺過程中亦泣不成聲：「第一個人我係寫畀自己，我好Care人哋點睇自己，要面對番自己比較難，想同自己講『你已經盡咗力，唔緊要』。」
周二（25 日）呢集講佢哋三人去高雄一間大學上電競課，有電競實戰及學做電競主播，原來電競科有體適能課堂，三人要挑戰做手指掌上壓，短短10秒已攰到出唔到聲，到底真係咁難、定「行發」再施展「水皮」一面？周三（26 日）播出嗰集講三人去一間初中體驗「堅‧離地」課程，喺足足三層樓嘅高度挑戰高空繩索及獨木橋，想知點解初中學生要學呢啲？密切留意全新節目《台灣學呢啲》！
《台灣學呢啲》逢周一至五晚 8 點半 J2（82 台）播映