由 林夏薇 周嘉洛 姜大衞 黃子恆 古佩玲 徐榮 陳庭欣 何沛珈 楊證樺 同 招浩明 等演出嘅新劇《寵愛Pet Pet》7月31號起就會接棒《天龍八部》播出。
《寵愛Pet Pet》故事圍繞資深獸醫 Paula金惠婷( 林夏薇 飾) 同動物傳心師汪聲仁( 周嘉洛 飾)呢對鬥氣冤家，性格倔擂槌嘅金惠婷不時四處焫火頭，而汪聲仁就觀人於微口甜舌滑，佢哋因為價值觀差異時有衝突。
阿仁其後因一次意外獲得同金醫生嘅「愛犬」冬甩嘅溝通能力，一人一狗因而建立友誼，阿仁仲幫冬甩逃離被閹割厄運，冬甩就幫阿仁解決工作問題。佢同金醫生仲因為冬甩嘅關係漸生情愫。
扮演動物傳心師嘅嘉洛，喺劇中同唔少小動物有合作演出嘅場面，除咗飾演冬甩嘅金毛尋回犬 Romeo之外，仲有貓咪、鸚鵡甚至蛇等等，嘉洛受訪時就指同小動物「演員」合作非常開心喇：「有啲動物真係好聽話、好乖，又識Un䟴吓跳吓舞，見到會覺得成個人都好治癒，佢哋帶到好多歡樂畀大家。」
至於同佢最多合作嘅「冬甩」Romeo，嘉洛就笑言：「冬甩係幾調皮嘅拍檔，同佢合作完全冇問題，佢嘅精靈同活力喺鏡頭前完全會展示到！」不過就續指冬甩疲累時會偶爾扭計：「冇辦法要讓吓佢，始終動物同小朋友控制唔到咁多，要畀多啲耐性，不過我哋成個團隊都好有耐性，薇薇就更甚，佢氹狗好有一手！」
劇中水火不容嘅阿仁同Paula，現實中其實不知幾老友：「同薇薇合作好順利、好舒適，大家默契度好高，基本上係零意見分歧，成套劇都冇真係好過份！同佢喺現場好多時都係嘻嘻哈哈、打打鬧鬧，佢照顧人方面都好好，有時食飯飲水佢都會提我。」
由於狗演員冬甩佔戲甚重，監製 陳耀全 為冬甩挑選「配音員」時就甚為謹慎，既唔想聲線太卡通、但又希望帶啲童真；結果經過多番Casting後，最終經演員兼資深配音員 蕭徽勇 建議下，由曾飾演池子孝嘅 阮政峰 出任，監製仲大讚阮政峰表現「恰如其分」。
阮政峰喺第二季《好聲好戲》中曾同蘇韻姿拍檔聲演，精彩表現當時已獲唔少讚賞；今次亦係佢首度正式挑戰配音，監製仲專誠邀請資深配音員黃鳳英喺政峰錄音時全程從旁指導，蕭徽勇亦探班同提出唔少意見。
政峰受訪時就坦言配音初期非常迷惘喇：「要拎走晒肢體動作同表情，淨係靠把聲去演繹係有難度，好彩鳳英姐同蕭徽勇幫手，同埋監製喺現場親自指導，所以都好快上手。」講到為冬甩配音嘅感受時，佢話：「大家一致認為唔好扮BB聲，所以都盡量似自己把聲，但就比較 Hyper啲。我自己都好鍾意配音，同埋好多謝前輩畀咗電影試音機會我試，希望有機會中啦！」
《寵愛Pet Pet》 7月31號起 星期一至五晚 21:30 翡翠台