台灣組合五堅情日前喺澳門舉行演唱會，五位成員 陳零九、邱鋒澤、婁峻碩、黃偉晉同賴晏駒以勁歌熱舞嚟為演唱會打開序幕，令台下一眾堅果聽到熱血沸騰，尖叫不絕。
小賴透露自己嚟到澳門後即病倒感冒發高燒，佢喺台上講笑由於怕傳畀fans，所以連日嚟都將自己困喺房，每天都係叫Room Service，小賴話直到開騷前一日，有酒店工作人員送餐入房時，同小賴講話佢好面熟，點知原來對方誤認佢係五月天，雖然小賴即時否認，話自己係五堅情，但對方竟然話唔識五堅情。
陳零九喺Solo時唱出〈Insane〉一曲，但唱唱下佢突然感觸咁喊起上嚟，事後零九話：「因為這歌算是我這陣子的心情，所以比較感觸一點，眼淚沒有Hold住，對不起。」換到偉晉Solo時，佢就透露fans相當熱情，仲送薯片畀佢食，結果搞到騷前生暗瘡，好彩化完妝後唔太明顯。
今次澳門站嘅演出同香港站有啲唔同，今次五堅情特別邀請咗幾位幸運嘅堅果上台，仲按各人嘅戀愛狀況即興送上〈愛我別走〉、〈今天你要嫁給我〉、〈背叛〉及〈Bad Boy〉四首經典歌曲。其中一對被邀上台嘅情侶，被問到幾時結婚？女方竟突然反問峻碩有冇打算結婚，峻碩毫不矯情爽快咗答「有啊！」令台下一眾堅果們傳嚟一陣騷動。成個點唱環節雖然是以搞笑為主，但成員輪流再向幾位幸運堅果送上抱抱，令台下嘅堅果們相當妒忌。演唱會上鋒澤、小賴同偉晉即興模仿韓國人氣女團（G）I-DLE〈Queencard〉嘅舞姿，之後五子又唱出廣東歌〈海闊天空〉，堅果們𣊬即嚟個全場大合唱，令氣氛推至極致。
五堅情喺演唱會後分享Show後感，當中病癒嘅小賴坦言騷前超擔心：「因為第一天我幾乎沒有聲音，直到第三天才好一點點，在綵排時還是很卡，但是有來看的朋友說聽不出我有感冒，那就好了。」對於是次特別獻唱Beyond嘅〈海闊天空〉，鋒澤表示：「在澳門嘗試唱粵語歌是最適合的，我們就第一次嘗試看看，然後唱得不夠好，請見諒，下次繼續努力。」而峻碩則說：「聽粉絲說，我唱很多髒話，對不起。」
呢次嚟到澳門，五堅情都有趁機遊覽澳門，亦有到賭場碰碰運氣，零九表示：「我是幾乎18個小時在賭場。」但鋒澤補充道：「我們是負責任的玩，我們沒有大下，小賭怡情，來到澳門，一定要感受這裡的風味。」
雖然演唱會巡唱暫告一段落，但鋒澤就透露嚟緊將再有安排：「也有捨不得，但也不是尾站，我們在安排未來可以去更多地方，一有消息會跟大家說，期待帶著堅果一起到處飛的感覺，希望這個旅程可以一直走下去。」而2023年下半年，五堅情將推出第二張創作EP《ROYAL》，鋒澤透露：「這次曲風可能會給大家一點驚喜，應該會有少少的突破，蠻多元化的，所以後半年會聽到新的作品。」
