由YouTuber發展到成為獨立唱作歌手嘅樂壇新人 吳爾珈 ，近日推出第二支單曲《仲夏夜之夢》，繼續自己作曲唱出心中所想。曾經遠赴韓國娛樂公司加入練習生行列嘅佢話，自己一直喺夢想同現實之間做唔同嘅抉擇。為咗成為真正嘅歌手更放棄唔少。
Yika話：「我覺得呢啲都係令我成長嘅經歷，呢啲抉擇更成為我一定要成功嘅動力！」新歌《仲夏夜之夢》正正係Yika嘅心聲，雖然為追夢放棄夢幻初戀，不過呢份真摯情誼就成為彼此嘅動力。
新歌曲風温和輕快，用唔同嘅弦樂編曲同埋清新嘅風鈴聲效，打造出輕盈甜美嘅旋律。Yika話：「《仲夏夜之夢》比之前首《戀愛駅》再甜啲、輕快啲，因為呢個夏天太熱喇，我想造首清涼感嘅歌，幫大家降降溫！」
Yika又邀請咗新晉演員 黃俊傑 擔任MV男主角，Yika仲話：「都會有啲親密動作，鼻貼鼻之餘仲要錫錫，我真係超級緊張，好彩有佢帶我入戲，所以到拍嗰陣好快就代入當咗JK係男朋友，回憶起真係拍拖時好sweet嘅感覺。」
Yika又話MV成功營造幸福感，要感謝JK同團隊嘅努力，「完成第二首派台歌件事真係好夢幻。個MV我哋特登去咗坪洲拍，雖然有啲趕，不過好似成班人去渡假咁，拍嗰日仲要好好天，啲景真係特別靚，完全做到我想要嗰種sweet sweet嘅夢幻感，辛苦晒大家幫我完成呢件事！雖然《仲夏夜之夢》個故仔係甜中帶啲啲苦味，不過好多人嘅愛情都未必可以去到終點，反而成為好好嘅朋友，我覺得呢份情仲難得！」