馬國明係TVB第14期藝員訓練班畢業，與一眾同期同學多年友情不變，雖然不少同期出道嘅同學已淡出幕前，放棄演藝工作轉行，眾人仍保持聯絡，一年一聚！
近日第14期藝員訓練班同學仔相約聚餐，當中見到「星二代」韓世麟，佢係女星汪玲嘅幼子，當年以藝名「凌子軒」入娛圈，佢哋相識24年，有時講吓舊事，有時分享新鮮有趣嘅話題，呢次聚餐未見同係第14期藝員訓練班嘅吳卓羲、黃子恆及葉璇出席。
凌子軒曾喺TVB經典劇集《十月初五的月光》飾演全海景（顏國樑）之子「全古東」，與唐文龍有不少對手戲，而同劇嘅汪琳更係佢嘅親表姐，當年凌子軒以一頭長金髮造型演出，可惜喺演藝路上發展平平，曾轉職地產代理。
凌子軒父親係商人韓德森，母親係息影女星汪玲，胞兄韓世灝曾涉足電影圈，擔任電影《門徒》及《花椒之味》出品人，凌子軒於2009年與女友喺中環四季酒店舉行婚宴，甄珍、鄺美雲、林青霞、狄波拉、狄龍及向華強等均有到賀，而凌子軒於2018年與第二任太太結婚。