TVB熱播劇《靈戲逼人》本周一至五晚8點半翡翠台播映結局篇，噚晚（25日）柳芳（龔嘉欣飾）死亡真相越揭越深，阿駿（張振朗飾）等揭發海哥（李成昌飾）當年曾因向柳芳求愛失敗動殺機，遂設局引海哥露出破綻，最終入局卻係海哥好友小菲（魯振順飾）。原來當年小菲因怕鬼喺劇團後台燒衣拜神，豈料意外釀成大火，收拾殘局時驚見柳芳屍體。為怕誤殺事件連累愛女若琳（阮嘉敏飾），小菲毅然毁屍滅跡兼向海哥自首，海哥因同情小菲處境，決定與小菲一齊隱瞞…
噚晚（25 日）焦點落喺兩大「綠葉王」李成昌及魯振順身上。李成昌之前憑《異搜店》 及《美麗戰場》演出贏盡好評，是次演技繼續揮灑自如，尤其遭冤枉係殺人兇手但又有口難言嗰幕，更係盡顯功架。魯振順憑「反差」搶焦，膽小怕事嘅小菲因自以為殺咗柳芳，深怕遭到報應，全程慌張又驚青。就喺小菲與海哥立定決心搵柳芳解釋事件來龍去脈，小菲被殺氣極重嘅柳芳上身， 並180度跳去兇狠mode，與懦弱人設明顯有出入，之後小菲再跪地爆喊，配以李成昌在旁不時展現心痛及難過等多層次表情，戲味十足！
魯振順受訪時透露拍攝呢幕正值大熱天，加上監製要求佢著「黑衣」增添神秘感，故拍攝時熱成「水人」，難怪爆喊場口不但涕淚交集、更汗如雨下，魯振順坦言拍到成身汗，由於拍攝時正值農曆七月十四前夕，其間有誠心上香祈求拍攝順利。談到與李成昌合作火花十足，魯振順笑指與昌哥係同期訓練班同學：「我哋呢四十幾年冇合作過，今次係第一次，真係好過癮，所以我哋都好珍惜同享受。」
據知噚晚所謂「真相大白」只係煙幕，殺死柳芳真兇另有其人，殺人原因更係出人意表，關鍵與噚晚新登場嘅角色江志強（吳瑞庭飾）及雲哥當年送畀柳芳嘅錄音機有關！向來眼利嘅網民，噚晚再度熱烈競猜誰是Big Boss，新出場角色江志強極速上榜，曲行雲（張振朗飾）及秋姨（謝雪心飾）被指相當有嫌疑，大批心水清嘅網民更力指柳芳突然瞓喺衣箱中肯定另有內情。 柳芳多番有煙消雲散跡象，今晚情況更不樂觀，原來柳芳煙消雲散並非「自然現象」，真Big Boss背後發功從中作梗。另邊廂柳芳為趕及喺大限來臨前一圓喺曲行雲面前表演唱大戲嘅心願，與阿駿合力苦勸敏敏（劉穎鏇飾）讓柳芳上身。到底柳芳最終會唔會一圓心願，透過大戲與愛人曲行雲「久別重逢」，眾人最後又搵唔搵到真Big Boss，為柳芳解除消失危機？密切留意《靈戲逼人》最後三集。
《靈戲逼人》本周一至五晚 8 點半翡翠台播映結局篇