為向唔同崗位專業人士致敬嘅《不可能任務》嚟到第2季，搵嚟徐榮、鄭衍峰Leonard、孔德賢Danny、林鈺洧Denice 同梁允瑜Chloe接受第三輪「建築工程實習體驗」挑戰。佢哋五人將接受一系列嘅建造培訓課程，由理論到實踐，包括學習釘板、紮鐵、落石屎等，最終佢哋要合力搭建一條可供小型貨車駛過、現實生活中真真正正嘅橋樑，先叫完成任務！
大學時期主修建築工程嘅Danny，坦言對任務充滿期待：「一層樓點樣起出嚟，其實我都識嘅，所以好期待！」正式接受任務挑戰前，五位需率先接受製作組嘅小測試，用啤牌砌出三層高金字塔，考驗專注力同定力。
男子組以 Leonard 表現最為出色，兩、三下手勢就極速完成任務，相反有「建築底」嘅 Danny 就一層都砌唔到，仲話係因為有風先影響表現。至於港姐出身嘅Denice同Chloe 就表現得雞手鴨腳，好在Denice勝在轉數快，靠「出貓」將啤牌對摺完成任務。
另外五人「不可能小隊」仲被安排同9位小學生比賽，喺30分鐘內製作「意大利粉橋模型」，荷載要達700克先至合格。Chloe未正式比賽前已大嗌驚輸， Danny就話：「如果我哋真係輸畀小朋友，咁就真係要檢討吓。」正式比賽時，五人就已經出師不利，Denice砌橋期間手指不慎被剪刀剪到流血，另一邊嘅小學生們已極速砌出意粉橋雛型！最終五人贏唔贏到，大家就得留意收睇！
由於「不可能小隊」之後要進入工地工作關係，五人需先考獲建造業安全訓練證明書(俗稱平安咭)，但喺考試當日狀況百出，唔只Danny、Denice 孖住遲到， Leonard就連筆都唔記得帶，想知佢哋點收科？記得留意收睇《不可能任務》第2季。
《不可能任務》第二季 星期日 22：00 翡翠台
