TVB熱播劇《靈戲逼人》今晚8點半翡翠台播映大結局，噚晚（27日）呢集Big Boss終於現身就係江志強，當年江志強（陳俊堅飾）貪念起偷咗雲哥送畀柳芳（龔嘉欣飾）嘅定情鑽石鈪；最終遭揭發惡行，江志強一怒之下燒死柳芳及亂刀插死雲哥。為掩藏當年罪行，江志強（吳瑞庭飾）表面上幫柳芳鬼魂盡量留喺人間，實質係出盡法寶加速柳芳煙消雲散…
吳瑞庭演技不容置疑，一個眼神及表情交足戲，睇到觀眾好肉緊，吳瑞庭係黎耀祥昔日藝訓班好友兼舊街坊，早前亮相TVB節目《回家》，連祥仔都讚過吳瑞庭仲係咁靚仔，吳瑞庭今晚更會演技大爆發。
而飾演後生版江志強嘅陳俊堅係2013年無綫藝訓班畢業，之前喺TVB節目《七線人棄王》曾自嘲係 「綠葉散打王」，劇集演出「十居其九」死不足惜，是次俊堅角色甚有發揮，噚晚插死雲哥嗰幕，更係肉緊至青筋盡現，俊堅受訪時坦言殺嘉欣比殺振朗緊張：「尤其放嘉欣入個箱嗰度要好小心，驚整親佢。」俊堅續指拍攝《靈戲逼人》期間，一度因意外遭鋼鐵刮傷腳、縫咗足足11針，當時仍有大量打鬥場面未拍攝，經過多番內心掙扎，俊堅為免影響劇組，決定頂硬上拍落去，俊堅拍嗰日要好小心個傷口，最難忘係有啲鏡頭要用真斧頭，真斧頭劈唔中振朗，但劈落個水壼嗰陣，水壼裂開咗一半，張振朗有鼓勵佢盡全力，而俊堅笑言今次終於唔使被殺。
《靈戲逼人》以「浪漫愛情」作主打，結局周終於浪漫味道「出晒嚟」。先說「駿芳CP」，對柳芳感情日益外露嘅阿駿（張振朗飾），為咗記下曾與柳芳一齊嘅痕跡，阿駿為柳芳親手素描二人合照；柳芳一心一意只希望踏完台板後能親手將錄音機還畀雲哥，「襄王有心，神女無 夢」煞是淒美。
另一浪漫擔當「東敏 CP」，阿東（阮浩棕飾）無視與敏敏（劉穎鏇飾）分手，於女方農曆生日當日跪地求婚，出動求婚鑽戒及DIY合照心意禮物盒，仲有由小到大合演過角色嘅大戲公仔；由於誠意十足，終抱得美人歸，二人更上演「甜蜜大迴環」。
浩棕笑言劉穎鏇好高，要抱起佢轉圈比較難平衡，同埋呢段戲用咗航拍，畫面時間比較長，導演要佢轉多兩個圈，浩棕稱過程有啲吃力：「記得其中一 take 拍完，Tiffany 笑我嗌咗出聲，原來我好似舉鐵咁『哼』咗出嚟，搞到我好尷尬。之後嘅每take我都要提自己忍住，唔好破壞氣氛！」浩棕又大讚劇組同事用心又認真：「嗰啲公仔佢哋首先要搵唔同嘅大戲造型做參考，仲要由造型到上色全人手製作。」
《靈戲逼人》今晚 8 點半翡翠台播映大結局