發哥 周潤發 繼續同電影《別叫我“賭神“》嘅成員現身宣傳，星期五現身香港大學，出席香港座談會。不過日日跑步嘅發哥，原來星期四發生意外，雙手手掌多處被石頭𠝹損流血，仲因為側身落地，令左邊身第四條肋骨骨裂，無論笑、咳甚至用力呼吸，都非常痛楚。
雖然醫生已叮囑佢要暫停跑步兩個月，但係呢日發哥仍帶傷現身講座，令在場300多名師生，都報以熱烈掌聲，感謝發哥信守承諾現身同大家見面。
發哥呢日提到，年輕時為幫補家計，並未完成學業，不過提早投身「社會大學」係自己人生中最寶貴一課。佢認為自己得到社會栽培亦贏得觀眾愛戴，自己最關心嘅，係希望將累積嘅智慧同愛分享予年輕人，回饋社會未來棟樑。
有人指現代人生有兩個甲子(60年)，發哥笑言自己68歲，以此理論推算自己只得8歲，同現場同學一樣係剛起步，又寄語同學要思考對家人同自己嘅責任。而佢本人就話要好好管理身體，到80歲時一樣可以有20歲嘅魄力去跑馬拉松。