TVB新劇《寵愛Pet Pet》逢周一至五晚9點半翡翠台播映，讓觀眾睇完劇集對寵物及動物有更深入了解，《寵愛》不少場口透過畫外音表達動物內心世界，由於動物唔會說話，聲音演繹變相對劇集十分重要。噚晚聲演陣容陸續曝光，除咗為主角冬甩配音嘅阮政峰、仲有董敬文、吳綺珊、李芷晴、霍健邦及易智遠等。 
噚晚（2 日）呢集亦係洋蔥滿滿，劇情講述狗狗皮蛋（董敬文聲演）遇車禍急須做手術，惟主人徐輝（鄒兆霆飾）一直玩失蹤。因一次意外獲得與冬甩（金毛尋回犬 Romeo 飾）「傳心」神技嘅汪聲仁（周嘉洛飾），藉著與冬甩「心交」得出重要線索並搵到徐輝，原來徐輝潛逃係因失業及太太（吳紫韻飾）懷孕等問題 唔夠錢支付皮蛋手術費，其內心好內疚；另一邊廂皮蛋並冇怪責主人， 想法十分懂事：「我知爹哋好想醫好我，但我唔想佢嘥錢，想佢留番啲錢畀小主人用，反正做狗，生又好死又好，始終有一日會返彩虹橋。陪咗爹哋咁多年，我冇遺憾喇，唯一可惜係小主人出世之後，我冇得陪佢玩。」
董敬文受訪時坦言配音時有被相關對白觸動：「始終為別人犧牲係需要好大嘅勇氣，同要好有愛。」敬文透露雖然自己唔係飼主，但偶爾有幫忙照顧好友馬貫東飼養貓咪，並笑言被融化：「佢養嘅貓咪生咗幾隻貓仔，佢有邀請我幫手照顧吓，佢哋好黐我，好得意！」敬文續指養寵物要負好大責任：「唔會貪一時過癮養寵物。」 
《寵愛Pet Pet》以感人與搞笑為主，是集搞笑場口相當經典，話說冬甩與一班狗仔Friend玩「真心話大冒險」，圍埋「狗噏」嘅有吳綺珊聲演妹豬、霍健邦聲演柴九、李芷晴聲演BB及易智遠聲演當奴，佢哋以生鬼調皮tone大放笑彈。 深感被閹割後雄風大失嘅妹豬大嘆：「閹完之後唔止把聲變咗做女仔，就連個名都變埋，我原本叫強牛，而家改咗叫妹豬！」至於選擇大冒險嘅柴九則被派去鬧主人，由於飾演柴九主人就係霍健邦，變相自己鬧自己，非常搞鬼。 
劇集播出後，飾演獸醫顏采兒嘅梁菁琳引起關注，身為《東張西望》外景主持嘅菁琳，入行前係一名獸醫，監製Andy睇中菁琳嘅獸醫背景，邀請佢演出獸醫顏采兒呢個角色，成為菁琳處女劇集作，菁琳亦有運用本身嘅專業知識或相關網絡協助劇組。 雖然身為獸醫，但菁琳原來對不少動物毛屑過敏，佢受訪時透露：「我對有啲動物有啲敏感，好似貓、狗、兔仔嘅皮屑，所以我主要係睇珍禽異獸多啲，好似雀鳥、鼠類、爬行動物、魚類咁。敏感對於做獸醫嚟講，話冇影響係冇可能，如果貓狗比較多時會用多少少敏感藥，所以都Handle到。」
《寵愛 Pet Pet》逢周一至五晚 9 點半翡翠台播映