陳嘉桓約滿回復自由身 視大腦皮紋分析師為終身事業

陳嘉桓 Rose 呢日宣佈長達16年嘅合約到期，正式回復自由身！對於跟舊公司劃上句號，Rose表示：「自己都好感恩，畢竟個合約係我14歲就開始簽，到依家都30歲，感覺自己完成咗一個成長階段，都好感謝舊公司，曾經投放好多資源俾我，又令我學識詠春，都有好多唔同的幕前機會。」

除咗回復自由身外，Rose仲宣佈咗另一個喜訊，就係最近考到ISO9001國際大腦皮紋分析師同導師牌。Rose話而家自己專注喺大腦皮紋分析嘅工作，仲將呢份工作由副業轉為主業，佢希望借助做藝人嘅經驗，將喺香港港較冷門嘅大腦皮紋分析推廣出去。

而家身為進階教班及培訓分析師嘅Rose，希望可以以此作為終身事業，不過佢話自己唔會放棄幕前工作，如有啱嘅佢都會參與。Rose又話之前參與遊戲節目《開心無敵獎門人》後，先知上完遊戲節目後自己有幾入屋：「啲小朋友嚟解報告時，都有講話Rose姐姐我哋都有睇你節目啊，平時都有玩啲咁嘅遊戲，可能訓練一啲詞彙，所以喺自己一啲平時拍攝嘅經歷同經驗，喺解報告時可以同佢哋分享。」

Rose透露自己而家籌備緊一本指紋天書，想借呢本書令大家更了解唔同指紋、唔同性格，可以應用喺唔同地方。