蘇淑萍畢業於無綫第二期訓練班，淡出幕前息影多年，不過佢一直跟圈中好友保持聯絡，早前適逢蘇淑萍生日，一眾演藝圈大前輩出席其生日宴，文雪兒喺社交平台貼出多張合照，更祝賀壽星身體健康及永遠美麗。
胡楓、羅蘭、呂有慧、程可為、高妙思、黃允財、鄧英敏、吳麗珠、劉緯民及吳君如媽媽冬嬸等好友現身，眾人開心喺酒樓敘舊，高妙思以前拍慣古裝，其古裝扮相清麗可人，自從90年代淡出娛樂圈，一直與丈夫思維長居歐洲，有時天熱留喺葡萄牙，天冷就喺意大利滑雪，閒時會去比利時、荷蘭、法國及西班牙等旅行體驗當地風土人情，曾經有6年時間冇返港，直至2019年回來探望其母親，留咗喺香港兩年，目前從事海外升學顧問嘅工作，當然要多啲同老朋友聚舊。
身邊嘅程可為仍活躍於幕前工作，有份參演《隱形戰隊》及《隱門》等，早前拍完《非常檢控觀》，見程可為戴珍珠耳環同頸鍊，打扮貴氣十足；同樣打扮高貴嘅呂有慧，當年藝訓班畢業後獲力捧，後來宣佈與武打明星金童結婚，呂有慧為咗家庭一度淡出幕前，曾復出拍劇過戲癮，息影後嘅呂有慧生活低調，間中出席聚會。
