由「獎門人」曾志偉、 周奕瑋 陳嘉慧 余思霆 同 鄺潔楹 主持嘅《日本限定Super遊》， 今集會同大家一齊去被指能醫百病嘅草津體驗溫泉之旅。獎門人分享草津溫泉嘅神奇傳聞：「話說廣島爆原子彈時，有個日本人路過中咗輻射，全身爛晒冇得醫，政府送咗佢去草津，日日浸溫泉，浸足三個月結果好返，聽講佢走時99歲。」
今次佢哋到訪連續15年獲封日本N0.1溫泉之稱嘅草津，就當然要大浸特浸啦！霆霆同Judy率先體驗擁有300年歷史嘅岩戶之湯，溫泉因由山體表面掘空而成，所以又名洞穴溫泉，呢個溫泉有兩大功效，第一可調理內臟不適，第二仲傳說有美肌功效，啱晒貪靚女士。
之後獎門人再帶領Jarvis、Judy同霆霆一齊體驗當地著名嘅地藏之湯，因為地藏之湯嘅泉水有 38至48度高溫，所以浸之前有特定步驟，先用地藏之湯嘅泉水淋雙腳約30次，之後再淋後頸，然後再以木板「湯揉」降低泉水溫度。以泳裝上陣嘅霆霆同Judy身材一樣Fit到漏，一高一矮仲形成最萌身高差。
美食方面當然唔少得，獎門人、Jarvis同Judy呢集就品嚐草津最出名嘅天婦羅店，呢間以 Omakase形式招待客人嘅名店，廚師會選用當日最靚食材炮製天婦羅，大家品嚐呢間食店發明嘅帆立貝天婦羅，同埋用料十足嘅海膽天婦羅， 每個都用成半板海膽烹調，難怪獎門人都大讚：「一個字甜，兩個字完美！」佢哋4位仲穿着和服體驗日式「掃街」，大歎燒豬脷、燒魚等美食。
《日本限定Super遊》星期六晚 20:30 翡翠台