J2 繼年初推出嘅《自然系女子旅行》帶大家玩盡台灣各地之後，新一輯《自然系女子日本旅行》星期一起正式推出。新一輯《自然系》繼續有 林映暉 主持，加上同上一輯一樣嘅唔同靚女嘉賓助陣，包括「啦啦隊女神」 林襄 、「樂天女孩」 張雅涵 同新加盟嘅「無害女神」 林莎 ，一齊玩轉日本。
主打「自然美景」同「身心靈治癒之旅」嘅《自然系》，今次瞄準港人最愛旅遊地點之一，遠赴日本唔同地方取景，發掘當地別具特色嘅洗滌心靈體驗。而節目單單開場Intro已令人目不暇給，三位台灣女神隔空上演水着大激鬥！
打頭陣嘅林莎去到能登最北面嘅聖域之岬，入住建築喺懸崖邊、有450年悠久歷史嘅秘境旅館，又會大歎當地「波の湯」溫泉。以白色鏤空泳衣上陣嘅佢，同暉哥邊浸溫泉邊欣賞無敵大海景。
而「樂天女孩」雅涵就會上演水着放題，以多套唔同顏色水着上陣，每套泳衣都完美突顯佢嘅曼妙身段。至於守尾門嘅林襄今次會野性大解放，以交叉吊帶泳裝上陣之餘，亦會走入森林中享受泥漿溫泉。身為港女代表嘅暉哥同樣屬有料之人，浸勻所有溫泉嘅佢一樣會以多套水着同大家見面。
節目聽晚首集同大家見面，暉哥會同林莎到石川體驗農村生活，入住當地農家民宿， 除咗齊齊落田摘菜之外，亦會親自下廚炮製晚餐。到夜晚又齊齊換上傳統浴衣促膝談心，暉哥無意一問仲誤揭林莎瞓覺嘅怪癖：「跟我睡過的人……都說我很厲害。」非常耐人尋味。
而佢哋去「波の湯」浸溫泉時，熱愛浸溫泉嘅林莎亦再爆鍾意泡澡嘅原因：「因為家裏沒有浴缸，只要有得泡澡的地方，我都會很喜歡，如果我去溫泉旅館，晚上泡完早上還會再泡一次喔！」浸完溫泉後佢哋仲大開食戒，分別品嚐喉黑魚涮涮鍋同能登牛排，非常滋味。
《自然系女子日本旅行》7號起 星期一至五晚 22:30 J2