J2長壽節目《開卷》以推介好書為主旨，由林溥來（Patrick Sir）、 何泳芍（Honey）、布樂文 JB、伍韻婷及涂毓麟主持，今晚播出第 59 集《開卷》，開播一年多來默默儲落唔少粉絲，Patrick Sir笑言節目能走到現在，全靠兩大堅持，第一係J2台節目總監Tommy（盧思麟）就算開頭未有咁多迴響同收視，仍願意投放資源去繼續拍，第二就係個人嘅堅持，為呢個節目做咗好多功夫。
Patrick Sir指好開心喺街上遇到唔少《開卷》 粉絲，當中必然會問嘅問題就係「你真係本本書都有睇㗎」，Patrick Sir笑言好多人以為係人哋寫稿畀佢哋，其實佢哋個節目係冇稿，全部嘢都係佢哋個人睇法，由於一星期要介紹一本書，Patrick Sir坦言每日都認真睇書，更指自己嘅Booklist對書迷有幫助；佢透露已有書局向J2及《開卷》招手，合作建立「Patrick Sir開卷書單」，定期推出讓書迷買書嗰陣多啲選擇。
Patrick Sir曾踏足接近200間學校講talk，加上主持《開卷》後，佢喺推廣與閱讀有關嘅主題更係事半功倍：「我有咗《開卷》主持呢個身份，就更加有動力睇更多書，更知道點樣去推廣閱讀，同埋而家仲多咗talk以《開卷》嘅名義進行。」 Patrick Sir喺大學畢業後，因自覺不足先開始「瘋狂睇書」，覺得書本吸收回來嘅知識，與互聯網上學到始終有分別：「睇書可以啟發深層思考，同埋書本入面嘅知識通常都經過好多資料搜集，文字咀嚼亦會細好多。」 
Patrick Sir近日喺《破毒強人》有份演出，首度飾演人渣感強烈嘅角色，問到多睇書對背劇本有冇幫助，佢笑言：「背劇本對我嚟講又真係唔算好難，可能真係因為成日睇書，會快啲理解到個故事。」
《開卷》逢周一晚11點J2（82台）播映