溫碧霞 近年除咗潛心拍攝傳記式電影，仲有其他影視作品之外，原來亦默默創立自家服裝品牌，佢以自己名字命名嘅品牌「Irenena」正式面世，已經開設網店同推出第一批由Irene親自設計嘅十幾款服裝，Irene仲親自擔任模特兒拍攝硬照宣傳。
Irene話：「之後試過幾次喺時裝週行catwalk，不過做Model影硬照都係第一次，非常好玩過足癮，以後只要時間安排到，都想盡量親自示範，親自影時裝相。」
Irene又話網店已投入運作幾日，反應不俗，仲有其他品牌提出合作，而Irene就話細節會交由同事處理。目前已着手設計第二批服裝，佢話：「品牌有女裝同男裝，暫時未有童裝，希望先專心做好成人服裝，至會考慮出童裝，希望可以做到多元化。」