江欣燕與前夫吳積遜喺2013年7月承認離婚，結束拍拖10年，結婚12年嘅感情，當時江欣燕講過自己與前夫之間有好大段距離，最後佢決定離婚，江欣燕近日接受電台節目《星光背後》訪問，首次披露當年決定嫁吳積遜（Jackson）係因奉子成婚，但結婚前夕卻經歷小產打擊。
江欣燕喺節目談及復出後由演主角變配角再演母親角色嘅心路歷程，同時又講入行後兩段情，包括佢與初戀男友張衛健嘅五年情，以及與前夫吳積遜由結婚到離婚鮮為人知嘅經過。
張衛健係早一屆嘅新秀冠軍，而江欣燕同屆參賽者吳國敬係張衛健嘅小學同學，比賽期間張衛健來探班因而認識及對佢展開追求，江欣燕覺得張衛健好幽默，入行後佢仲教江欣燕睇劇本及分場，江欣燕承認與張衛健呢段情一直備受父親反對：「因為當時我太細個，會認定佢教壞我，認為我哋冇拍拖，新秀比賽結果會好啲，唱歌會發展好啲，點會呢？我根本冇學過唱歌，亦從冇想過做歌手。」因戀情長期受壓，江欣燕最後因雙方工作繁忙，江欣燕先提出分手：「我都想喺度解釋返！其實我同佢（張衛健）分手，同當時彼此嘅事業有冇起色無關係！只係想停吓，係和平分手！」
江欣燕喺2001年與拍拖10年嘅商人吳積遜結婚，婚後淡出幕前變身闊太，江欣燕首次披露當年決定嫁吳積遜係因為奉子成婚，但結婚前夕卻經歷小產打擊，「最初係驗孕捧兩條線中咗，爹哋好開心，個個都話結婚啦！Jackson又訂到生日嗰日嘅場地。怎料到五月，我忙完爸爸媽媽結婚周年嘅主持，突然一次企高拎嘢感到雙腳乏力，再搵醫生檢查後，先發現胎兒冇生命跡象，醫生指呢個情況懷孕不足三個月好常見。但我係接受唔到，好失望，咁仲結唔結婚呢？但我已約咗周刊做結婚專訪。」
江欣燕結婚表面開心，其實佢本人情緒崩潰咗一陣，於2007年重回TVB拍劇，江欣燕指當時二人關係好好，佢只係受夠自己過住糜爛生活，唔想每日打牌行街、飲酒夜蒲，接近天光先瞓，日上三竿或日落西山先起床，最終佢決定復出開工，直至2013年拍《M Club》先離婚。
江欣燕重申離婚與第三者無關：「同呢個人相處咗20年覺得悶，最大原因我中間拍《畢打自己人》，搵到返工作嗰種開心，感覺有自己嘅世界，一個人更加開心，不如分開。」江欣燕單身10年，暫未有搵新對象嘅打算：「我結過婚嘛，係好恐怖嘅事嚟㗎，而家不知幾咁自由，哈哈！」
江欣燕於1985年參加華星新秀殺入十強，一出道拍劇就做女主角，由唱歌變身演員兼扮嘢能手於80年代創出事業高峰，雖然一度因結婚退出幕前，直至2007年重投TVB拍劇，先後憑處境劇《同事三分親》、《十八年後的終極告白》及近日播畢嘅《靈戲迫人》獲得觀眾認同。