TVB訪談節目《奇蹟小店》穿梭香港大街小巷，尋訪各行各業嘅特色小店，逢周一至周三晚上10點半翡翠台播映，聽晚（14號）播出呢集係肥媽帶領龍婷及丁文俊分別走訪日趨式微嘅傳統上海理髮店，以及深水埗舊式手錶店。
顏老闆及太太經營上海理髮店超過半世紀，理髮店係二人現時消磨時間、與客人閒話家常嘅聚腳地，見證二人歷盡歲月嘅愛情；對於舖頭與老婆，顏生承諾都係「一生一世」。當年為咗「嫁雞隨雞」， 顏太隻身跟老公嚟香港開店，人緣超好嘅佢更大方公開待客經驗之談：「呢個係服務業應有嘅態度，對客一定要好。」
難得到訪喺60至90年代曾盛極一時嘅上海理髮店，來港後一直想體驗香港特色傳統文化嘅龍婷，親身落場一試顏師傅手勢，頂住懷舊髮型化身花樣年華，別具風味。龍婷恤髮期間，笑言由於初來港時有感剪頭髮太貴，曾想過投身剪髮行業「慳錢」，可惜最終遭母親一句打沉：「我有喺屋企試過幫媽咪剪咗幾次頭髮，我諗自己見住人哋剪咗咁多年，咪試吓咯，剪完之後媽咪就話『貴咪貴啲咯，下次我都係出街剪』。」
至於丁文俊走訪嘅舊式手錶店，店主陸老闆大談店舖興衰，更分享當年數度經歷槍林彈雨嘅駭人往事，店舖防彈玻璃有遭斧頭劈過嘅痕跡，天花板及牆壁亦有唔少當年留下嘅子彈窿，老闆憶述：「真係有伙記驚到瀨尿。」肥媽、丁文俊及老闆又大談手錶嘅重要及珍貴之處，肥媽展示當年辛苦儲錢買下嘅第一隻手錶：「人可以話走就走（離開或離世），但一件死物可以留番好多回憶，係嗰種珍惜同害怕失去嘅感覺。」
後晚（15 日）呢集肥媽帶領曹敏寶走訪兩間風格截然不同、以香港製造為主嘅鞋店，當中手製繡花鞋店第三代Miru，為咗令面臨失傳嘅繡花鞋傳統藝術得以延續，佢緊貼潮流、一再突破傳統框架轉變經營模式，引入潮流元素，一度成功吸引美國時尚達人Iris Apfel注意；曹敏寶喺節目試穿繡花拖鞋，便係Miru精心設計嘅作品。喺繡花鞋匠人眼中，繡花鞋可為人生唔同重要時刻增添意義， 曹敏寶坦言至今仍有Keep住當年出嫁嗰陣所穿嘅繡花鞋：「我有一仔一女，睇吓邊個跑出先，送畀新抱抑或我個女。」而每集仲有加插鮑聖光深情獻唱貼近主題而又感人嘅經典歌，第四及第五集金曲分別為《My Friend》及《前程綿繡》。
《奇蹟小店》逢周一至三晚 10 點半翡翠台播映