由有創意班主之稱嘅 彭美施 領軍製作嘅粵劇新《胡不歸》演出後口碑載道，日前再於戲曲中心重演兩場，仲喺觀眾掌聲下三度謝幕，觀眾對文武生王志良同花旦梁非同演出大為讚賞，施姐亦披露新《胡不歸》有機會第三度重演。
施姐指重演劇本經過一番修改，比首演更完善，將不合理劇情微調，好似當中《決戰遼王》、《從軍別母》，等都有作改動付劇情更為緊湊。佢又感激藝術總監尹飛燕對兩位主要演員嘅多方面指導。
而燕姐就大讚兩位演員大有進步：「非同仲有志良默契比先前好，有默契之後感情亦拿捏得到位，我覺得志良今次演《哭墳》，投入嘅感情好連貫，非同演《別妻》感情亦非常投入。其實今次劇本略為修改後，演員嘅演出我亦有所調教，所以演出較上次更緊湊，觀眾欣賞亦更舒服。」
王志良亦坦言演出比上一次順暢：「相比第一次演對角色更熟悉，加上第一次演出之後繼續揣摩每句歌詞、人物性格， 重演時候就更投入，一開場我就融入自己係男主角文萍生，要每一場戲都投入角色好難做到。」
花旦梁非同對觀眾大讚佢同志良之間嘅默契就話：「默契增加令演出亦暢順咗，其實重演有一定壓力，望每次演出都帶俾觀眾新嘅感受，為演好趙顰娘呢個角色，半年來我睇過好多唔同類型嘅戲，特別係慘情、苦情戲作為參考。燕姐又指導點樣演得更仔細，所以我同志良變得更信任對方，呢兩晚謝幕聽到好多歡呼聲、掌聲，我好感動，感謝大家支持! 」
賈思樂同林建明亦有捧場欣賞，今次更係Louie首次入場睇粵劇，佢話：「粵劇真係好難做，係好特別嘅藝術，我唱歌就叻，但粵劇要記歌詞仲有走位，真係好難 ! 雖然我係「鬼仔」，但都睇得明喎，男、女主角做得很好，我好鍾意佢哋。」見Louie講到咁興奮嘅沙姐，就笑佢話：「而家又唔係話叫你做，你過係觀眾嚟欣賞啫 ! 」Louie就即場同沙姐講，話下一次由佢哋演出做男、 女主角喎。
