TVB訪談節目《奇蹟小店》今晚（16日）播出呢集有主持肥媽將夥拍「好聲音」代表顏志恒及梁浩銓，先後走訪擁有65年歷史的二手書店及經營30多年嘅租書店，今晚「鮑大人」與顏志恒即興 Jam歌，二人一動一靜，相當有火花。
顏志恒呢集走訪二手書店，除咗歷史悠久，書店第三代傳人即現任店主，當年係《大時代》飾演劉青雲童年嘅黃寶龍。昔日輪廓依舊嘅寶龍，大方暢談當年拍攝《大時代》點滴，佢透露與劉青雲接觸機會唔多，大家只係因劇中一首英文詩接觸過，反而與劉松仁及鄭少秋相處較多，寶龍憶述指秋官絕對係「大俠Style」入血：「我印象中佢真係有大俠風範，喺服裝車佢都會耍兩吓，同你傾吓偈都大俠咁，入咗血㗎喇 ！」無所不談嘅寶龍，又透露因為曾志偉關係，將初吻獻畀當年同樣係童星嘅唐寧。
寶龍十多年前接手書店，喜歡「感受書的溫度」，感覺走進二手書店感覺就好似尋寶，寶龍親身帶肥媽去書店唔同角落尋寶，又帶志恒體驗收書工作。雖然寶龍一再強調拍攝當日嘅收書過程相對輕鬆，但顏志恒拎過兩大袋書一秤後，即忍不住驚嘆：「都有啲重量喎！」顏志恒更好奇寶龍有冇試過因搬書弄傷腰，寶龍坦言十個有九個半條腰都整親過，寶龍仲帶製作組去店舖舊址話當年，分享當年營運模式，仲展示好有歷史價值嘅書店招牌紙袋，寶龍透認為經營二手書店嘅使命就係點樣保存啲書得好啲，再承傳落去，祖訓係「面對困難，就要迎接」堅持信念。
梁浩銓則前往張氏夫婦用心經營多年嘅租書店，與店主大談租書店歷史興衰、不同年代嘅本土漫畫代表作，當中最大亮點係《百分百感覺》作者劉雲傑原來係張生張太嘅熟客仔，劉雲傑更現身節目：「會去吓佢哋度搵靈感，佢哋好好，知我係漫畫家，都會同我傾吓偈，又幫我搵吓漫畫，嗰時大家好似街坊咁，成日都見。」張氏夫婦坦言若果唔係顧客支持及熱情，佢哋冇辦法堅持走到今日。
節目仲有「音樂情人」 鄭子誠聲音導航，繼續加插鮑聖光獻唱《學生哥》及《分分鐘需要你》；「鮑大人」獻唱時長雖然有限，但每次現身均十分搶焦，獻唱歌曲夠貼題之餘，演繹亦別具感情，獲大讚係節目亮點，風頭不輸鄭子誠！
《奇蹟小店》逢周一至三晚10點半翡翠台播映