王鎮泉 Jeoffrey 每星期為你提供最熱辣電影資訊，中外猛片專訪花絮上映時間全部集齊。「電影泉攻略」每周四買定爆谷陪你睇新戲。
本周新片速遞有DCEU全新超級英雄電影《藍甲蟲》講述一位大學畢業生對未來滿懷抱負，點知意外取得一個外星生物科技古物「聖甲蟲」，被揀咗做共生宿主，令佢獲得神奇超能力，超級英雄「藍甲蟲」就此誕生；《全個世界都有電話》由周國賢、韋羅莎及陳湛文主演，講述3位中學好友相約喺25年前買咗人生一部手機，將對未來嘅憧憬以SMS發畀對方，相約25年後聚首揭曉內容，點知呢個飯局竟然改變佢哋嘅一生。
電影《烏托邦浩劫》改編自韓國人氣漫畫，由李炳憲、朴敘俊及朴寶英主演，以被大地震摧毀嘅廢墟城市首爾為背景，講述一班聚集喺唯一一座未倒塌「皇宮公寓」內外嘅人於生死關頭前展開鬥爭，爭奪物資同空間。
泰國電影《租嚇》改編自多個泰國真人真事，講兩公婆搬屋之後，自從將空置房屋出租後，身邊接二連三地發生怪事，妻子發現丈夫每晚出現詭異行為、女兒更被邪惡力量威脅，為咗拯救家庭，妻子要揭開呢間屋嘅恐怖秘密；《麵包超人大電影：露寶莉與窩心的禮物》居住喺「機械彗星」嘅機械少女露寶莉喺出外尋找一樣「重要東西」時，與同伴機械小鳥小琴遇上麵包超人及一眾新朋友，渡過快樂時光，點知細菌人突然出現，仲將「機械彗星」大肆破壞，究竟麵包超人佢哋最後可唔可以成功擊退邪惡！？
由古天樂、張智霖、吳鎮宇及呂良偉主演嘅《暗殺風暴》故事描述神秘Darker開始發放「死亡通知單」，預告將在何時以何罪向何人執行死刑，背後暗藏千絲萬縷嘅關係，吳鎮宇坦言呢套戲好燒腦呈現人性暗黑面，而特技化妝師Gary亦為古仔化咗兩、三個妝，當中化爛面妝先做咗假皮，今次用嘅物料都係Hollywood級數最高。
本周票房戰況截至8月16號中午，第3位係《GT跑車浪漫旅》、第2位係《芭比Barbie》、第1位就係Christopher Nolan 最新執導大作《奧本海默》。
