《2023香港小姐競選》下星期日就會舉行決賽，近日16位佳麗已經投入為當晚作最後準備，而大會亦發布各位佳麗嗁晚裝造型，16位佳麗身穿唔同色系同帶透視效果嘅晚裝，展現華麗優雅一面。
晚裝造型色系多變，配以佈滿胸前同裙襬嘅花朵pattern，令佳麗們猶如七彩花仙子一樣奪目又耀眼。除咗色彩鮮艷之外，晚裝造型設計亦各有特色，除咗突顯腿部線條的高衩設計、亦有突顯腰部曲線條嘅露腰設計。
今屆形象監督 陳惠英(Karen)接受訪問時，直指造型都係了解過每位佳麗嘅個人特色同身形優點後；逐件度身訂造而成，Karen話：「希望令佢哋望落靚之餘，亦配合到佢哋個人嘅特色。」
而為配合大會主題，今屆佳麗造型都偏向明亮鮮艷，並以突顯女性美為主，Karen指：「晚裝嘅底色我哋採用咗Nude Colour，即係偏近皮膚嘅顏色，希望藉此突顯女仔自己本身身形嘅優勢同線條。服裝上面嘅花花圖案，係想帶出仙氣，同埋將佳麗年輕又Fresh嘅氣質展現出嚟。今年嘅造型係希望靚得嚟冇時空規限，同埋望落去係充滿生機嘅。」
Karen仲大讚佳麗們身形質素高：「今年佳麗身形喺咁多屆嚟講算係理想，一字排開，真係靚架喎，淨係對腳都真係好靚。」至於衣服物料方面，Karen指採用咗感光度較高嘅物料，顏色方面亦經過特別指定同染製，務求打造出「不一樣的港姐」。