TVB綜藝節目《奇蹟小店》本周播出最後三集，主持肥媽夥拍「好聲音」代表周吉佩、林鉫徫、羅啟豪、李佳及魏嘉信，繼續走訪各大歷史悠久小店，包括眼鏡店、海味舖、茶葉舖、旗袍店及西裝店，大談小店興衰與傳承問題，更探討夫妻、老闆員工及父子相處之道。節目除咗繼續有「音樂情人」鄭子誠聲音導航，鮑聖光亦繼續穿插獻唱經典金曲，本周三首金曲分別為《陪著你走》、《永不放棄》及《洋紫荊》。
今晚（22日）呢集講肥媽與喜愛品茶嘅羅啟豪一齊落場體驗傳統包茶葉真功夫，又帶咗林鉫瑋去傳統海味店、學習點樣挑選適合自己口味嘅靚臘腸。值得一提就係店主傅秋榮原本只係打工仔，因為人老實又上進，經過五、六年嘅觀察，海味店老闆終於認定傅師傅，仲將其寶貝女兒介紹畀傅師傅，成功抱得美人歸，以女婿身份繼承店舖。
聽晚（23 日）嗰集見肥媽與李佳去百年歷史旗袍店，與店主簡漢榮暢談旗袍史，簡老闆讚嫌棄自己有肚腩仔嘅李佳擁有葫蘆標準身形，係穿旗袍的標準衣架。李佳更穿簡老闆為其精心挑選嘅白色旗袍大晒美好身段；本身愛穿旗袍嘅李佳，仲帶對其別具意義嘅紅色旗袍喺節目中開心 share，又指每當見到旗 袍便會想起外婆：「外婆年青時成日著旗袍，有次我哋翻箱底見到佢有好多旗 袍，我都有拎嚟試著。」 
而噚晚（21 日）嗰集講北角眼鏡店店主鄧生及鄧太，分享婚姻保鮮大法，二人愛情既簡單又美好，攜手經營眼鏡店，高峰期曾藏有約四萬副名牌懷舊眼鏡，消息傳開後火速成為人氣潮店，備受不少明星藝人熱捧，周星馳及肥姐沈殿霞曾係店舖客人，鄧太透露當年肥姐一出手便買幾十副眼鏡，肥媽與吉吉更即席試戴各款懷舊眼鏡。
鄧生鄧太當年盲婚啞嫁，結婚多年依然恩愛如昔，鄧太笑言二人愛情保鮮法就係「做乜都要打孖上」，鄧太指相處融洽要互相忍讓，覺得唔開心就「冷戰」唔出聲，食早餐一定要兩個人，去邊多數一齊，肥媽大表認同：「最叻嘅女人就係唔出聲。」肥媽分享御夫術笑言自己從前與亡夫鬧交時，以扁嘴及「扮冇嘢」等奇招引老公先say sorry，每次都好有效， 全程乖乖做旁聽生嘅周吉佩則感嘆：「我都真係要學吓點樣同太太再和諧啲相處，配合好重要。」
《奇蹟小店》逢周一至三晚 10 點半翡翠台播映