由堪輿學家 麥玲玲 同三名J2ers 黃紫恩（Jojo）、吳兆麟（Alan）同 陳欣茵 （Sonya）主持全新花生味濃清談節目《玲玲友情報》。玲玲姐今次唔睇風水轉同大家吹水，仲會邀請來自唔同界別嘅好友，喺節目圍繞事業、 愛情、金錢、家庭、健康、是非等範疇大講特講。
多位嘉賓好似有愛情導師Angus 、元祖級補習天后June、醫美達人Cindy同埋職場女王Son姐等；而為節目打頭陣嘅，仲係吹水程度直逼宇宙級、有「金牌婚禮司儀」封號嘅 林盛斌 。阿 Bob除咗會分享擔任婚禮司儀多年嘅有趣見聞，亦會指出婚禮三大「錯重點」笑料，好似「新娘瘋狂換衫」、「致辭過長」仲有「以茶代酒」，內容爆笑之餘更加發人深省。
阿Bob又被玲玲姐同幕後大逼供，追問佢主持婚禮嘅「最高叫價」！想聽阿Bob笑談「重點」有幾錯嘅實用分享，仲想八卦佢最勁身價有幾多？就要密切留意聽晚首播嘅《玲玲友情報》喇。
阿Bob被逼供亦大派婚禮花生，當中最爆笑嘅就係曾被「醉爆社團外父」考起喇，佢話：「賓客飲醉係經常發生嘅，無端端上嚟話要講嘢喎，呢啲好驚，唔知你講咩嘛。我試過喺一間好大型嘅星級酒店，女家屋企人應該有啲背景，去到尾段外父衝咗上台，佢攞咗我支咪，然後拎住支咪指住新郎briefing，佢把聲勁沉勁沙，好Godfather咁話：『我同你講，你對我女好啲…』跟住全場靜晒，佢繼續講：『如果你對佢唔好…』跟住佢就爆粗喇…」
深感不妙嘅阿Bob， 情急下將「奶奶」搬上枱，最後成功以奇招冧掂外父扯開話題。高峰期一日走兩場、一個月做足十次婚宴司儀嘅Bob，雖然主持婚宴經驗非常豐富，不過依然會偶有失手。佢仲曾因記漏資料，出現極之尷尬情況
阿Bob話：「有次簽完紙我請老爺奶奶、外父外母上台，我猛問外父喺邊，跟住新娘子話：『咪話咗你知爸爸唔喺度嘅』， 我即刻嚇到標晒冷汗！」Bob仲指另一次則「好心做壞事」:「嗰次又係請晒四個上台， 我話：『既然咁開心，不如三pair一齊錫錫』，原來我唔記得其中一pair係分開咗，然後佢哋好尷尬咁望住我。」
而最感動嘅婚宴時刻，佢就話係一對藝人嘅婚禮喇：「婚禮最緊要係致辭，陳家樂同連詩雅嘅致辭就好感動喇，喺多謝屋企人時，家樂講番啱啱出嚟做藝人，未搵到咩錢，當時阿爸喺佢唔為意時偷偷地塞錢落佢度，佢一講佢就喊、連詩雅又喊，下面阿爸嗰圍喊，連楊受成博士都忍唔住喊。因為一定有啲人由細湊到你大，佢哋就係等緊呢一句多謝。」
阿Bob續指已向子女名言，將來結婚必須要至少預備三分鐘致辭多謝自己同媽咪，阿Bob仲感嘆話：「一年總有幾個婚禮我會忍唔住眼濕濕，尤其係新娘子講多謝爸爸嗰啲，我個人狀態係去咗外父度。」
《玲玲友情報》 8月30號起 逢星期三晚 23:00 起 J2