藍奕邦 一連三晚嘅《SNUG IN MY ARMS》音樂會圓滿落幕，全場迫爆，重返首次個人騷場地開唱嘅阿邦份外感觸，尾聲時仲話即將展開巡迴演出呀。
甫開場曾三度同阿邦有音樂上合作嘅嘉賓顧定軒已令台下起哄，佢先後獻唱由阿邦創作嘅《教我》同《XY》，仲大讚阿邦係自己嘅天使：「上年我第一年做新人，阿邦就陪我行咗三首歌，所以好多謝佢。」
之後主角阿邦正式登場，一口氣獻唱《你倫敦我紐約》、重新編曲嘅《可樂》同《Cocktail》等歌曲。相隔9年再次開騷嘅佢，呢次表演亦別具意義：「我好開心可以返嚟藝穗會做騷，Fringe Club呢個場地係我仲未出唱片、未簽公司，仲係有份day job嗰陣，就嚟唱歌嘅地方，嗰時得兩、三個人聽，仲係我啲朋友嚟。廿幾年前，我喺呢度表演嗰陣真係乜都冇，而家可以再返嚟仲有人睇亦多咗好歌，我都冇浪費咗廿幾年。」
之後阿邦獻唱為陳蕾填詞嘅《妖治時代》，仲向觀眾指希望每次開騷都可以為樂迷提供安全區，等大家盡情釋放情緒。之後演出《孔雀開屏》時，阿邦指當年同林夕希望透過音樂回應社會對性嘅偽善：「可悲嘅係，9年後呢首歌仍然啱用。」
年前一直受情緒困擾嘅佢又話：「我真係好開心好開心，因為5、6年前，如果你叫我企上個台，我係即刻panic attack，我都解釋唔到。由前晚、噚晚到今晚，我可以喺個台上唱到廿幾首歌，真係奇蹟！其實好怪，好少artist可以停咁耐，仲可以出返嚟。」
阿邦笑指自己過去曾經創作唔少「憂鬱文青系」同「怨婦系」音樂，過往為塑造積極光鮮形象，反而令情緒出現在問題：「嗰時我食嗰啲精神科藥物，兩個月肥咗40磅，成屋都褲都著唔到，尤其嗰時我好想自己好靚仔。今次出返嚟，我好希望大家知道唔一定要完美嘅，可能大家都有嘢係療癒緊，關關難過關關過，我之前都無諗過可以出返嚟唱㗎，所以其實OK㗎。」
連場多首歌曲後到Encore環節，阿邦先後唱出《圍牆倒下前》同《生》，佢話：「呢三晚我做得好開心。開騷前唔止一個人同我講，可能今次係最後一次喺香港睇我啦，我都有啲難受，好彩疫情完開返關，嚟緊呢個騷會先去北美洲，之後再有其他站。我哋一定會好快好快再見，無論你係香港定外地，我都祝福你生活安好。」最後送上《說再見的對象》，用音樂為樂迷送上祝福。
完騷後阿邦話自己既興奮又不捨：「今次個騷係對自己同歌迷嘅交代，之前真係完整一首歌都唱唔到。呢幾年我有好努力畀心機康復，做完一個完整嘅騷好開心。因為每次唱之前都擔心身體不適，唔係情緒問題，但係會影響唱歌嘅，好彩呢三晚都好順利。」
對相隔9年再開個人騷，更選址到出道前舞台表演，阿邦直認曾經猶豫：「上年我同小巧做騷，係佢踢我先敢諗，因為一直猶豫自己應唔應付到，唔止係唱歌，仲有騷前準備嘅嘢。返嚟呢度，頭先綵排嗰陣我都好感觸，廿幾年前冇諗過到今日仲有人聽自己唱，真係覺得自己冇嘥到呢廿幾年。」真阿邦又透露完成香港站演出後，今年內將分別到多倫多同三藩市等北美洲地區演出。