袁富華（Ben哥）及吳肇軒、伍詠詩、阮兆輝、陳麗雲及蔣祖曼等主演嘅電影《說笑之人》，未上映經已獲得獎項肯定。袁富華及吳肇軒喺第17季芝加哥《亞洲躍動電影節》，分別榮獲演藝事業成就獎，以及璀燦新星獎，而《說笑之人》將喺9月16號於電影節舉行世界首映，袁富華及吳肇軒將親身出席並接受大會頒發獎項。
Ben哥獲得演藝事業成就獎：「得到獎項當然開心又興奮，好想多謝《說笑之人》一眾台前幕後的工作人員，要是沒有大家的堅持就不能在疫情期間排除萬難去完成這套電影。此外更加要多謝每一位參與這套電影的演員，特別是飾演我個仔的吳肇軒，他是位聰明的演員更是位非常願意付出的演員。當我們在初期準備中，他已經準備好成為一家人，所以到正式拍攝時已經好容易建立出父子關係，多謝你吳肇軒。最後要感謝導演區焯文，因為不論在討論劇本還是在現場拍攝時，他都用行動去證明很相信我並耐心聆聽我的意見，亦給予很大的空間和自由度去演繹華哥這個角色，」Ben哥希望各位觀眾可以支持《說笑之人》，希望能帶畀觀眾一次溫馨又感性嘅旅程。
吳肇軒則表示能夠獲獎當然開心及感恩，榮耀歸於Ben哥，感謝Ben哥願意攞個心並教識佢好多：「幾乎每一位在戲中飾演過我爸爸的演員，我親生爸爸都好想跟他們合照。剛好這套戲講父子，所以令我感受最深、最有印象、最開心，希望這個爸爸跟我親生爸爸快點合照，知道親生爸爸都等了這個機會很久。早前見到Ben哥在訪問中提到我經常整蠱佢，但佢都有成日整蠱我，因為佢成日都着住件背心底衫話自己好似韓星阿Rain，想借今次機會同Ben哥講『一點都不似啊！』」
戲中圍繞棟篤笑呢個大主題，當中許多棟篤笑表演都係由香港棟篤笑演員阿添度出來，軒仔再加入一啲自己嘅想法。軒仔自爆自己好鍾意睇棟篤笑，平時亦有留意各個地方嘅表演，「地獄式笑話最啱口味，不過有時會較為過火，台灣方面踩界得來又過癮。不過明白到棟篤笑正正是需要大家去講一些平日講唔出口，但觀點獨特，喜劇中情理之內、意料之外的事」。
伍詠詩指出喺疫情期間拍攝一啲都唔易，跟區焯文導演、Ben哥及吳肇軒合作合作非常開心，一邊拍攝一邊討論，自己鍾意棟篤笑，但從未有機會嘗試，要表演棟篤笑都有難度，伍詠詩喜歡睇卓韻芝表演棟篤笑，一來係港人講香港事，二來係有時提及女性主題，而睇外國棟篤笑就可以學習地區文化，加深了解人哋嘅笑點，幾有趣又會學習到新知識。
而9月7號將會舉辦《說笑之人》棟篤笑特別場，舉辦首個既有戲睇又有棟篤笑的節目，請觀眾一邊食爆谷飲汽水，一邊欣賞男主角吳肇軒、本地楝篤笑大師Vivek Mahbubani 及Tim Chan嘅棟篤笑現場表演，一起度過一個爆笑又窩心嘅晚上。
《說笑之人》講文少（吳肇軒飾）從小已經察覺父親華哥（袁富華飾）跟其他大人有啲唔同：說話冇邏輯、理解力差、容易被騙，懂事後先知道爸爸智力的確比正常人低，母親更因此離家出走，留下文少子代母職，照顧父親。一次偶然機會，文少為咗獎金參加棟篤笑比賽，立即便迷上！觀眾笑聲帶來無比成功感，但係佢之後就冇再成功引觀眾發笑。為咗找尋靈感，文少發掘生活中可笑之處，但係佢發現終極嘅笑其實係苦中作樂──在校時同學嘅恥笑、畢業後工作嘅艱辛、照顧華哥時嘅點滴、甚至係影響全球世紀疫症……生活之苦也可以係歡笑之源！