J2 全新噱頭飲食節目《30 分鐘收工料理》，瞄準香港人瘋狂OT、貪快同貪方便三大特質，以快靚正、一煲過搞掂兼且唔使洗好多碗為節目使命，教觀眾快捷易煮菜式。
製作組請嚟七大名廚為節目揸大旗顯身手，當中較為家庭觀眾熟悉嘅，係曾主持美食節目《新派煮意》嘅前六星級酒店大廚暨連鎖集團行政總廚張倩敏(Charmaine Cheung)，現時主理烹調藝術班嘅Charmaine，曾吸引張曼玉、劉嘉玲同梁朝偉等成為座上客，同唔少藝人亦私交甚篤， 有「星級教煮」封號。
另曾推出《鹹蝦燦之味》、《鹹蝦燦味道日誌》嘅星級料理班烹飪導師John Rocha，係一名中葡混血兒，自少就鍾意烹飪嘅佢，從嫲嫲同媽媽身上學到唔少正在失傳嘅澳葡家庭料理食譜，堪稱澳葡家庭料理專家。其餘五位名廚分別係曾於三星米芝蓮餐廳工作嘅法式餐廳創辦人Esther Sham、曾於檳城酒店擔任總廚嘅正宗娘惹菜系擔當 Derek Choong、擅長新意念港式菜嘅高級餐廳行政總廚Will Leung、有開設烹飪學校嘅西日式甜品大師 Muse Leung，同埋星級酒店中菜主廚嘅新派粵菜擔當小儀。
除咗星級廚師夠吸引，節目每集主題亦相當抵死特別，有引發共鳴感嘅「開會開到腦閉塞」、「突然間想帶飯」、「返工坐到發晒福」 同埋「老細亂發脾氣」系列，另外仲有關心觀眾健康嘅「成日對Mon眼都乾」、「忍尿忍到腎都虧」 及「壓力爆到甩頭髮」系列，相當抵死。
《收工料理》每集會派出兩位名廚大顯身手，8月31號同9月1號播出嘅，主題分別係「出咗糧食豪啲」同「又要開OT」系列，示範菜式包括小龍蝦海膽意粉、娘惹黑果蠔汁炒大蠔麵、日式洋蔥澆汁滑蛋飯及米仔粉咖哩。主廚 Derek 除咗會教大家香港邊度可以買到黑果外，仲會教大家點食「有毒黑果」最安全。另外七位主廚亦會開心share大量烹煮秘訣及貼士，例如教大家如何利用「黑魔法」提升餸菜鮮味、煮意粉水溫幾多度為之最 good，及泰國魚露優勝之處等，萬勿錯過。
《30分鐘收工料理》逢星期一至五 20:30 J2 82台