9月12日係一代巨星張國榮（哥哥）嘅67歲冥壽，一生中摯愛唐鶴德（唐唐）每年準時發文懷念哥哥，今年佢一如既往凌晨12點喺社交平台「Happy Birthday to you, Leslie」表達對哥哥嘅思念。
今年係哥哥逝世20周年，其生前愛人唐唐透過IG貼出哥哥照片，頓時勾起「哥迷」心中嘅回憶， 哥哥於2003年愚人節離世，多年來哥迷及親人對哥哥嘅愛戴及擁護始終不變，當年哥哥離世，唐唐以「未亡人」身份主持喪禮，唐唐經歷20個年頭，依然掛念摯愛。
唐唐跟住再貼出一張合照：「分享一張生日合照，我們一起祝福『哥哥』生日快樂。」相中見哥哥從後抱住唐鶴德，面貼面向鏡頭，哥哥流露出甜蜜微笑；而每年 「912」都係屬於哥哥嘅日子，資深哥迷更自資喺9月7號至9月15號喺尖沙咀彌敦道重慶站二樓舉行《Happy Birthday To Leslie想你20年珍藏展》，吸引各地哥迷及後榮迷到場支持及欣賞。
