TVB開拍實驗真人騷《爸知弊！你嚟湊吖！》直擊時下藝人家庭爸爸代表獨力湊仔表現，由黎諾懿及陳敏之化身「爸知弊幼稚園」校長及副校長考驗四大藝人家庭爸爸代表，本周參與節目藝人家庭代表有陳展鵬、單文柔（Phoebe）及女兒小豬比。聽晚（14號）播出第五集，小豬比初時表現怕醜冇乜反應，展鵬只可「恐龍」上身氹阿女。
展鵬與小豬比接受製作組安排連番任務，包括「小豬比睇電視二揀 一」、「小豬比接龍大賽」及「小豬比教爸爸整飯團」，第三個任務係製作組根據Phoebe事先指出「展鵬弱點」進行針對式設計，Phoebe笑言：「佢唔識煮嘢食，如果佢湊小豬比，佢真係可能淥杯麵。佢都好似未試過自己單獨湊小豬比，有啲擔心！」
經過首輪熱身任務，小豬比與諾懿及敏之混熟即精靈Level Up，喺「接龍大賽」 大晒萌爆表情包，包括聽到心儀卡通人物嗰陣即點頭畀讚，又連番亂答問題整蠱爹哋媽咪。其中一條「小豬比最唔鍾意做嘅事」，展鵬回答：「好多喎！坐定定食飯。」此言一出小豬比翹晒雙手扮嬲豬，並行使「職權」大派交叉。
展鵬應製作組要求爆阿女口頭禪「我係咪好搞笑」及「你唔好話我」。 當小豬比完全進入狀態後，製作組安排Phoebe「偽裝」離開，留下展鵬獨自湊女。 進入第三輪任務前，展鵬須應Phoebe 要求教阿女「眼耳口鼻」英文生字，其間小豬比「聽啲唔聽啲」，出奇不意使出「獅吼功」，嚇到展鵬一度「暈倒」；諾懿叫小豬比表演「機械舞」緩和氣氛，小豬比收到order即分別表演「好有電」及「冇晒電」版機械舞；小豬比跳「冇晒電」版刻意慢動作兼梗頸，表情亦由多變活潑變成呆滯，眼神不時流露「求助signal」相當爆笑。小豬比跳完舞與諾懿瞬間零距離，整飯團時繼續與諾懿「蜜蜜」斟；眼見展鵬完全被無視， Phoebe大表心痛：「我可唔可以出去安慰吓佢？我驚佢唔開心呀！」最終展鵬以一塊「芝士」成功挽回劣勢，氹掂小豬比埋身挨住，到底咩芝士咁神奇？
小豬比另一爆笑位係無厘頭「暴走」，展鵬整飯團期間忽發奇想「芝士扮榴槤」， 大感莫名其妙嘅小豬比逐隻字「凳」出來：「做~乜~嘢~榴~槤~ 呀？！」接住諾懿問小豬比係咪需要為飯團加牙齒，小豬比再度爆Seed大叫：「唔使呀！嚇死我呀！」佢又忽然向鏡頭肉緊高呼：「我傻傻地呀。」雖然小豬比似係主力搞笑，但兒童心理學博士Rosa認為小豬比有「CEO 型性格」，到底有咩特質？密切留意聽晚最新一集《爸知弊！》本周五（15號）現身嘅素人家庭代表有Ricky、Tiffany及Sophia，熱切期待與Sophia碰面嘅小豬比，將施展渾身解數照顧比自己細兩歲嘅「妹妹」，展鵬及Phoebe亦會繼續大放閃光彈，萬勿錯過！
《爸知弊！你嚟湊吖！》逢周四、五晚 10 點半翡翠台播映