蔡思貝主持嘅旅遊節目《貝遊歐洲》嚟到最後一集，今集將會來大家暢遊「水都」威尼斯，感受當地獨特嘅歷史氣息及文化。蔡思貝親身踏足嘆息橋，感受威尼斯歷代囚犯由法院步入監牢前嘅「最後景緻」，之後又戴上威尼斯傳統面具、穿上由人手一針一線縫出嚟嘅宮庭服暢遊水都。
坐喺貢多拉上嘅蔡思貝，引嚟唔少人圍觀同影相，心情大靚嘅佢仲搞笑公開擇偶：「各位單身、孝順、專一、幽默、風趣、強健，可以打電話畀我，我已經準備好喇。」其實蔡思貝喺節目入面多次流露恨嫁心情，之前遊歷阿爾卑斯山景點時，就公然搵屬於佢嘅新郎：「有冇人同我結婚呀？係就飛過嚟意大利搵我啦！」、「未來嘅新郎，如果你想向我求婚，搞婚禮地方想畀個驚喜我，記住睇《貝遊歐洲》！」
蔡思貝去到意大利阿爾卑斯山嘅科莫湖更興緻大發暢玩水上運動，見到個超靚海灘時，佢又自爆好想嘗試裸泳：「成日好想試吓咩都唔著去游一次水。」
對於今次喺20幾日暢遊歐洲 9 個城市，蔡思貝坦言開心：「同當地人交流，甚至乎呼吸每個地方嘅氣味，呢啲先可以深印 喺腦海，只有切切實實經歷過先可以記一世。」
《貝遊歐洲》最後一集 9月13號 22:30 翡翠台
