TVB新劇《你好，我的大夫》噚晚（14日）講絲絲（陳嘉慧 Erica 飾）因為一次意外「尾椎歪位」惡化，向中醫界骨科聖手路玉麟（張武孝 大 AL 飾）求醫，路醫師派出愛徒路遠志（吳偉豪 Ricco 飾）為絲絲進行手法復位，即係將手指插入肛 門後再將尾椎撥回原位。
由於治療須除褲，絲絲、遠志及助理辛之桃（關楓馨飾）大感尷尬，單睇眾人錯愕樣就覺得搞笑。最終遠志使計搵之桃做槍手，不 過絲絲並唔知情，誤會遠志「醫完唱」鬧爆兼潑水。網民睇完拍爛手掌，洗版式留言指笑爆嘴，讚嘉慧BB與Ricco呢對CP好睇有火花，又讚Erica演技有進步、擺脫清純形象變高傲酷Girl，懶音亦有改善。
Erica受訪時笑指拍攝「探肛」場口，集尷尬、想笑、佗佻於一身：「嗰場係好搞笑，係我自己親自演出，雖然有除褲，但牛仔褲入面有再著多條褲。現場要趴喺張床度拍攝，佢哋就影住我後面或者喺我後面做戲，我就成晚都趴咗喺度，仲食零食幾佗佻，我有忍唔住笑；當然淨係著住打底褲趴喺度係有啲尷尬，不過觀眾都知最後係關楓馨幫我探，所以多數企我後面嘅都係女仔，咁就少啲尷尬。我覺得成場戲最難係要做出探肛嘅反應，要近鏡吖一聲，因為未試過！」 
其實4位年青演員Erica、游游、Ricco及孔德賢憑劇中角色引發討論，入屋指數最高就係孔德賢，佢飾演Edgar，外表陽光正氣，為人熱心、樂於助人易相處，不時擔當新人與經驗醫師嘅溝通橋樑；加上百分百 「媽寶」人設，工餘時間幾乎成日黐住阿媽，又對媽咪言聽計從兼從不吝嗇送上 「愛的抱抱」，絕對係媽咪心目中嘅「完美兒子」。孔德賢受訪時坦言Edgar係其近年最有發揮亦好喜愛嘅角色：「佢同我本人有啲相似，都係好鍾意氹身邊人開心，同埋佢好有故事，演嘅時候自己都得到好多反思。」談到與玉梅姐合作，孔德賢笑指起初既害怕又尷尬：「劇入面我要嗌佢Honey，初初唔知點嗌出口； 但後來大家熟咗，佢又真係當我阿仔咁關心同照顧，所以就愈合作愈開心，佢會成日買嘢畀我食。」 
《你好，我的大夫》逢周一至五晚 8 點半翡翠台播映