Yumi爆After Class即將重聚 XiX減肥出道錄歌笑到喊

鍾柔美 同 XiX 呢日為一個電台活動擔任嘉賓，近日推出新歌嘅佢，被問到After Class會唔會有機會喺 炎明熹 即將舉行嘅首次個唱重聚時，就預告After Class同《聲夢》其他成員都會齊齊到場欣賞，仲話努力收拾心情開學迎接來年嘅公開試，會繼續努力加油咁話呀。

XiX今年正式出道，受到恩師加經理人 郭偉亮 栽培嘅佢哋，就話Eric對大家非常嚴格，Vici仲話自己係減磅最有成績嘅成員呀。為新歌錄音雖然一啲都唔易，不過當中亦都有唔少笑料，Crystal仲被爆失控狂笑唔停，仲笑到喊唔識停呀。