袁富華同吳肇軒主演嘅電影《說笑之人》早前參加咗芝加哥《亞洲躍動電影節》，日前佢哋就去到當地出席電影節，同行仲有電影《白日之下》嘅編劇兼導演簡君晋同演員梁雍婷。
電影節上，袁富華榮獲演藝事業成就獎， 而吳肇軒同梁雍婷則獲頒璀燦新星獎。對於獲獎袁富華表示相當開心：「趁今次感謝《說笑之人》幕前幕後的所有演員以及工作人員，亦要感謝電影節的主辦Sophia以及一班工作人員，還有天下一電影公司。希望《說笑之人》可以讓芝加哥的觀眾認識香港真摯感人的小品故事，同時希望他們喜歡這套電影。」
而同樣有份演出《說笑之人》嘅吳肇軒，對於獲獎一事佢謙虛咁話：「多謝電影節頒予獎項，獲得電影節的肯定令我相當開心，電影從來都不是一個人的工作，將榮耀歸於台前幕後所有人。」吳肇軒又指特別想多謝管理嘅同事Michelle，因為對方好希望佢哋呢代電影人，可以好似一粒燦爛嘅新星咁，畀全世界嘅歡眾都睇到呢代電影人嘅作品。雖然難得去到國外電影節，但吳肇軒指自己冇時間留喺當地旅遊，短暫逗留一日就會搭凌晨機返香港，咁趕住返港嘅原因，原來吳肇軒係想盡快返嚟謝票：「因為『票房告急』，雖然電影未開畫我已經講告急，但真心好想快點飛返香港跟觀眾見面、交流，希望多點人支持《說笑之人》。」
同樣獲頒發璀燦新星獎嘅梁雍婷，則指獎項畀咗佢莫大嘅鼓勵：「多謝每位跟我合作過嘅導演和演員，很開心可以將港產片帶來芝加哥。我參與的《白日之下》、《把幸福拉近一點》以及《不日成婚2》都是極不相似嘅角色，三套電影都在討論不同面貌嘅香港，在此感謝芝加哥觀眾給予熱情反應。」
