張敬軒早前喺演唱會上宣佈嚟緊會開演藝學校，仲指學校會喺今年內正式公開招生，張校長為咗幫學校招生，日前佢為樹仁大學嘅聯校歌唱比賽擔任評判兼表演嘉賓時，就把握機會叫有興趣嘅同學DM佢喇。
由於歌唱比賽嘅主辦方事前做足保密功夫，所以當司儀介軒公出場時觀眾即時炸開鍋。比賽前軒公先為各參賽同學打氣，為咗令大家輕鬆啲，軒公仲搞笑咁話：「聽講好似有人唱我啲歌，邊個咁沙膽！」之後又話自己係嚟學習，仲話每次睇啲大學比賽都覺得啲參賽者好勁，甚至有啲可以原地出唱片，軒公話：「所以希望嚟呢度睇吓有冇啲有潛質嘅新人，大家要加油啦！」
而當司儀邀請軒公上台分享表演心得，軒公話最重要係投入：「我覺得社會上嘅工種都帶唔到嗰種腎上腺素興奮嘅感覺，所以我覺得做表演嘅人係好開心，應該好好地咁enjoy個舞台。」佢又指企喺台上驚係好正常嘅，就算事前綵排得很好，一樣都會緊張，軒公同大家分享：「呢啲叫做『Stage Fright』，係完全正常，就算無論幾大嘅super star，佢哋都會有呢樣嘢。只不過係佢哋嘅經驗同training有冇辦法令到佢哋喺首歌嘅前奏，或者喺佢嘅第二句就已經可以冷靜到自己。」軒公指抒緩緊張嘅方法就係同觀眾交流，好似同大家打吓招呼、或者派吓心心：「當你同觀眾建立咗一個關係嘅時候，其實你會對佢哋有信任，咁你就唔會怕佢哋。」
原來只預備唱兩首歌嘅軒公，見觀眾不斷狂呼encore，佢亦滿足觀眾需求再次出台唱多首歌，期間有同學希望同軒公合唱，佢亦一一答應。
