秦沛兒子姜文杰日前患上重感冒，嚴重後遺症左耳現暫時失聰，佢噚日喺IG動態留言交代病况，透露深夜開始嚴重頭暈，佢成晚趴喺馬桶，只要稍微郁吓都會嘔最後終於頂唔順，呢10幾個鐘頭佢黃膽水都嘔埋出嚟，由於星期日搵唔到專科，佢只好去醫院急症求醫。
姜文杰被兩間醫院急症診斷患VERTIGO（暈眩）同ACUTE LABYRINTHITES（內耳炎）：「話分秒必爭，如果再唔睇專科開STEROIDS，我左耳聽力會永久受損，可能聽唔到高音，兩張醫生紙都寫著URGENT、ALARMINGSYMPTOMS...希望個天幫幫手。快啲畀我遇到耳鼻喉科好心人救救我。今日會繼續打電話，同時去醫院排隊，求集氣。」 
姜文杰噚日凌晨叫救護車送院：「希望可以盡快打類固醇，救救耳聽力，同埋睇身體接唔接受。黃金48小時……錯過就好大件事，好多人留言話屋企人都試過，好多case嗰啲終歸聾咗救唔返。」佢獲送院後接受腦部電腦掃描，醫生估計佢因病毒攻擊耳膜神經，以及掌管平衡嘅「耳石移錯位」，雖然情況不罕見，但狀况比平時個案較嚴重，佢嘅左耳聽力僅剩15%功力：「有啲高音Pitch更近乎零，看情况可能需要CALL車代步一段頗長日子，因為頭暈可能會持續幾個月到一、兩年不等，至於康復進度如何，就睇我自己身體。」