《中年好聲音2》星期日晚播出第三集，一共有32位選手登場比實，仲有三位5燈選手誕生！
43歲嘅 李浩森 曾為首屆《超級巨聲》嘅參賽者，身為歌唱導師嘅佢獻唱《一見你就笑》，又唱又跳令全場氣氛High爆，肥媽更加未聽夠20秒就撳燈，更大讚：「你唔係以舊方法去唱，你用新嘅方法去演繹，令到大家好輕鬆。」而伍仲衡仲笑言：「我略嫌你唔夠癲，曳啲啦！」說罷更企起身示範，場面搞笑。
而第二位得到5燈嘅係35歲嘅古淖文，嚟自澳門嘅佢係一位藝人同司儀。混血型男淖文既高大又有型，佢選唱英文歌《A Change Is Gonna Come》大晒騷靈唱功，成功獲得5燈成績，評判陳慧嫻仲興奮大讚：「你今日唱得好正，你企出嚟已經係巨星風範，你已經唔係參賽者，我當咗你係巨星！」
至於第三位獲5燈嘅選手係39歲嘅財富管理經理朱博文，佢跳唱歌神張學友嘅《頭髮亂了》，大曬超強假音，尾聲再Chok一個型仔Pose，台風十足。令伍仲衡都大讚：「你一出聲就一鳴驚人，唱得非常之好！」張佳添更笑言：「你係一個䟴唱歌手，臨尾整呔嗰吓好正，我好鍾意。」
而獻唱《無言感激》嘅胡光駿雖然只獲1燈成績，不過佢背後嘅故事就相當勵志。現年51歲嘅胡光駿係一位星級髮型師，佢喺節目首度披露不為人知嘅過去，佢深呼吸後話：「我細個時感 覺唔到屋企人嘅愛，之後我就離家出走，喺88年8月8號，我因為恐嚇勒索、 傷人、刑事毀壞，被判咗入沙咀勞役中心，曾經有兩年失去咗自由，嗰次之後，我覺得呢個世界好似冇咗，好彩出返嚟之後好多人鼓勵我，我立志要用自己經歷講畀青年人聽，只要你肯努力，你都可以攞得返！」
胡光駿仲感激太太對自己不離不棄：「佢喺我人生最低谷時，佢都陪伴住我，我有時好 情緒化，佢都會默默咁忍耐。」
《中年好聲音2》 星期日晚 21:00 翡翠台