中醫題材醫療劇《你好，我的大夫》，星期一晚劇情講述西醫成子謙( 鄭衍峰 飾)同方奕菲( 甄采浠 飾)因為病人關穎璇( 關嘉敏 飾)肝酵素突然超標，矛頭直指開藥予關㯋璇嘅辜清勁中醫 師( 何廣沛 飾)，清勁更被逼引咎辭職，否則中西醫協作計劃將被煞停。
不過事件背後原來另有陰謀，因為方醫生係成家傑醫生( 曾航生 飾)太太，仲早已得悉清勁係成醫生早於大學時期同前女友所生嘅兒子，逼清勁辭職完全係公報私仇，不過成醫生不但未阻止妻子惡行，仲喺重要一刻投下關鍵一票將清勁逼向絕路…
觀眾喺播出之後唔止鬧爆方醫生同成醫生，仲以方醫生最受指責，唔少觀眾認為42歲嘅甄采浠保養得宜，笑指佢可以勝任「萬國城」(《一舞傾城》)媽媽生之餘，亦佢扮演32歲嘅鄭衍峰媽咪感到新鮮。
Carisa受訪時話，要扮演比自己真實年紀大一截嘅角色有啲擔心，幸獲監製鼓勵：「監製同 我講咗個角色後，我都覺得好有挑戰性，只係我都有啲擔心自己個樣未必夠年紀。」 Carisa 指戴眼鏡同紮髻造型有助投入角色，不過亦多咗限制：「戴咗眼鏡就有個小局限，就係我唔可以郁得太勁，因為一郁就會反光，驚會反射到個鏡頭影響拍攝。不過咁亦都好嘅，因為我個角色心計好重，雖然內心控制欲強又易呷醋，但礙於喺人前要Keep住係好媽媽、好太太、好醫生，所以好多嘢要收埋喺心，唔可以外露，對我嚟講好難。」
首次飾演醫生嘅Carisa，仲要破例喺屋企「背對白」：「因為我鍾意將對白變生活化，所以主要都係記point。今次係我唯一要背對白嘅角色，好多對白都唔係咁生活化、又有唔少專業名詞，對我都係一個挑戰。」
而監製 方駿釗 就指Carisa係一直好想合作嘅演員， 又大讚對方喺《果欄中的江湖大嫂》中嘅演出：「佢完全唔化妝、甚至化醜自己演出，我覺得佢演得好放，對佢印象好深刻，一路想搵佢合作。今次難為佢要做人哋阿媽，仲要有鄭衍峰咁大個仔，但我覺得佢氣質係啱嘅。佢都好做到嗰種內斂，但又要忌住何廣沛同曾航生嗰種感覺，演得好細緻。」
《你好，我的大夫》星期一至五晚 20：30 翡翠台