由 鍾澍佳 總監製 黃國輝 監製 陳翹英 編審嘅《香港人在北京》，10月9號起首播，新劇分別由 陳展鵬 洪永城 吳若希 蔡潔 戴祖儀 傅嘉莉 吳業坤 同 陳星妤 等參與演出。
《香港人在北京》講述一班「北漂」香港人喺北京生活遇到嘅趣事，Lucky Man徐港仁( 陳展鵬 飾)原本事業一帆風順，但係因為同太太鄺海倫(吳若希 飾)投資失敗損失慘重，撞正獲公司委派到北京出任CEO，以為翻身有望嘅佢帶埋太太北上發展，但實情就係被昔日宿敵明升暗降，為面子無奈被逼留喺北京發展。
另一邊廂港仁嘅細佬徐港文(洪永城 飾)同妹妹徐寶怡( 戴祖儀飾)同樣因為唔同原因到北京投靠哥哥，最終一家人集思廣益、發揮「唔得都要得」嘅香港人精神，將廢棄工廠打造成文創園區。
新劇劇情主打輕鬆溫馨路線，展鵬、Jinny、Tony同Joey呢家人唔鬥氣唔舒服，又喺劇中鬧出連串笑話。視帝展鵬繼先後喺《隱形戰隊》同《隱門》飾演大奸角之後，今次搣甩暗黑風大曬喜劇細胞，除咗爆笑演繹港人喺內地遇上嘅文化差異笑話外，又會大曬惹笑港普。
而Jinny飾演嘅事務律師鄺海倫，除咗做跟得老婆隨老公北上發展默默支持，必要時又會為老公出頭，非常有情有義。雖然恩愛非常，但就因為港仁喺北京重遇失婚舊朋友蘇菲( 蔡潔 飾)，迎來一場中年婚姻危機！
展鵬受訪時指一直期待喜劇演出，佢話：「今次好多對手完全未合作過，大家喺現場有好多火花。」而劇中嘅爆笑港普，展鵬就笑言：「好多年前喺內地拍戲時真係講港普，以前講同聽都有問題，而家識多咗好多普通話， 所以今次講返港普都冇以前咁淋漓盡致。」
今次佢同Jinny首度合作就飾演夫妻，展鵬就大讚Jinny天分極高：「佢係一個好有天分嘅歌手同演員，佢有幾樣嘢做得比我好，有一場戲佢要喺屋企好性感咁去勾引我，我從未見過咁嘅佢，佢拿捏得好好，反而我係有啲怕醜！」
Jinny入行13年首度擔正女一，Jinny就笑言並無特別緊張喇： 「我每次做配角嘅時候都當自己係主角咁樣去做，接到角色已經知道係一套輕鬆小品，所以演戲之前長期提醒自己，千祈唔好有包袱，要去到盡，唔得都要得！」
Jinny仲指空閒時同展鵬狂傾子女經：「因為展鵬帶埋囡囡一齊返內地開工，所以成日見到小豬比同爸爸媽媽嘅相處，令到我好掛住自己嘅小朋友，所以我都成日攬住佢個女一解我思女之愁！」
《香港人在北京》星期一至五晚 21:30 翡翠台