由陸浩明、曾比特、陳葦璇同糖妹主持嘅J2王牌節目《我要瞓鬥》，經過一周嘅比賽後，剩低10 組「瞓鬥師」。佢哋要留喺錄影廠內繼續馬拉松式玩遊戲，爭奪10萬元獎金獎品。
2號晚播出嘅一集，就延續之前嘅集體「搵鐘」任務，藝人同素人群體合作打破隔膜。講到表現最突出嘅，當然係樣子甜美嘅瀅仴同拍檔劉倬昕(Samlau)，瀅仴連環破解三大IQ 題，成為智力擔當，連主持陳葦璇宣布解題成功一刻，都露出驚嘆表情。
瀅仴接受訪問時，笑言可能係睇得多推理劇同漫畫有關：「好鍾意睇偵探電影、劇集同漫畫。Benedict 套《新福爾摩斯》睇晒 4 季，每季都 loop 足兩次，咁 Benedict 又真係好 charm 嘅。」瀅仴自言身為處女座，對細節警覺性較高，亦特別鍾意睇懸疑、要花腦力去估、去諗嘅戲。
而被瀅仴視為勁敵嘅Nicole同Amber，Nicole唔只展現腦力擔當，佢同6號仲化身金句王。當有「瞓鬥師」齋講唔做時，6號即爆金句揶揄「有講無做，動作指導」，而Nicole就用哲學味濃嘅金句嚟鼓勵自己：「呢個世界無解唔好嘅嘢，只有解唔開嘅自己。」經過多場遊戲任務，奶仔同文叔就盡顯黑馬本色，奶仔以體力取勝，而文叔表現「慢活」冷靜，喺危急關頭曾發揮起死回生作用。
3號晚播出嘅一集，眾「瞓鬥師」遊戲進行咗16小時，經過小休同放飯，10 組「瞓鬥師」再次踏上征途，進行「接棒」同「我好眼瞓」兩項對決。涉及罰 Coins 各人打醒精神，經過短暫和諧，素人同藝人再現互篤情況再。
《我要瞓鬥》 逢星期一至五 22:30 J2
