堪輿學家 麥玲玲 同3位J2ers 黃紫恩 陳欣茵 仲有 蔡景行 主持嘅節目《玲玲友情報》，聽晚一集主題係「補習唔係咁樣補」，嘉賓元祖級補習天后 June Leung ，仲會大爆補習圈陰招。
三位年青主持讀書年代都分別上過「雞精班」補課，Jojo話當年喺元朗補習，教英文嘅男老師每次上堂會對學生評頭品足︰「去到唔係先教你嘢，會叫你坐好啲，唔好咁私縮呀。嗰位老師超級惡，不過好多人爭住上佢堂，超級爆。」。
而Yan Yan就講起當年每月花費幾千蚊上補習班，最誇張就係有啲課堂要凌晨排隊報名，仲有同學通宵排隊，只係為咗上某幾個星級老師嘅課堂，好似追星咁，只係想見吓對方。
而玲玲師傅就自爆曾擔任私人補習老師，當年係喺超級市場廣告板貼紙仔，寫上自己電話等人邀請上課。玲玲話自己非常受家長歡迎，不過自覺耐性唔夠，所以最後放棄教學。佢仲爆老公曾表示假如有朝一日失業，會再任當補習老師。
而嘉賓June Leung縱橫補習界多年，見盡圈中古靈精怪。見識過有老師預備一份錯內容嘅筆記︰「上堂時先同學生講『呢啲(錯)係我專登用嚟跣偷印我筆記嘅學生。所以麻煩你將個段扠咗佢』。」
June見盡千奇百趣，又指有老師為吸引學生，專登研究chok爆聲線吸引學生上堂、多年前有補習天王更租大型戲院賣飛予學生上課，每次都幾乎爆滿。不過共中一次人數唔夠，佢寧願退票貼車馬費取消課堂，非常霸氣！
《玲玲友情報》 逢星期三晚 23:00 J2