TVB熱播劇《你好，我的大夫》下周播出結局篇，劇情每集均相當精彩，噚晚（4號）呢集焦點分別落喺路遠志阿Dee（吳偉豪飾）、桃表姐（關楓馨飾）、Ed師兄（孔德賢飾）及麥寶（區明妙飾）身上。
為咗發展成獨當一面嘅中醫師，阿Dee瞞騙爺爺路醫師（大AL飾）及嫲嫲林醫師（謝雪心飾）去廣州讀碩士、實則係外闖一試實力。噚晚為幫六君子醫舍吸客，阿Dee拉班漢（李紹堅飾）落水拍攝宣傳片 「路醫師與漢姑娘」。讓宣傳片面世，阿Dee順勢向爺爺嫲嫲坦白一切，不但辣㷫兩位老人家，桃表姐更因幫口成為被罵對象，不甘長期被睇低嘅桃表姐最終決定執包伏離開醫館… 
噚晚吳偉豪與李紹堅宣傳片相當震撼，二人有親密接觸，更嚟一個意外之吻， 睇到阿光（游嘉欣飾）及絲絲（陳嘉慧飾）肉緊偷笑。據幕後透露吳偉豪與李紹堅唔止咀咗一次，加上睡床空間太細，令佢哋逼得太緊兼忍唔住爆笑。吳偉豪拍呢場戲直呼尷尬：「唔知點講好，睇到劇本時真係好驚訝，拍嘅時候我諗唔單只我同紹堅，啲Crew都好尷尬，每次一CUT機個個都係『嘩』一聲。我哋拍完每個Take都唔敢睇Playback！」
吳偉豪獲網民封為劇集喜感擔當，與關楓馨經常一唱一和搞gag，合拍度十足。吳偉豪直指二人合作愉快，透露經常因忍唔住笑要NG：「其實尾椎糾正嗰場戲好搞笑，因為落手之前要𢳂凡士林，關楓馨一𢳂就𢳂咗成半樽，我同佢講你有冇睇到你隻手有幾多凡士林，佢都話係喎，唔係好Make Sense。」關楓馨首度喺劇集獲得角色，今次跟吳偉豪合作愉快，感激對方教會自己好多嘢：「好似機位、燈位 要企邊，望邊邊會影得好啲。」關楓馨喺研究角色有詢問父親關禮傑意見：「爸爸教我要完全代入角色，將自己所有諗法都變咗辛之桃時，拍劇時就會自然啲。」關禮傑喺劇集播出街後有留意阿女咬字及表情，給予阿女意見，家人亦對其演出十分緊張，差唔多每一晚都睇。 
Ed師兄與麥寶嘅感情發展亦好搶焦，之前劇情有唔少甜蜜互動， 礙於醫師及病患身份，Ed師兄刻意壓抑對麥寶感情，即使麥寶點樣苦纏，Ed師兄堅決忍痛斷絕來往。二人於診所攤牌嗰幕，無論係Ed師兄有口難言，抑或麥寶嘅無辜淚眼，均令二人演技獲正評。就喺二人不歡而散之際，麥寶遭衰老竇（李啟傑飾）埋伏，大驚嘅麥寶只好盡量匿埋並向Ed師兄求救；Ed師兄最終趕到現場，但因腹部劇痛不支倒下，眼巴巴睇住麥寶被捉走…此時「癌症復發錯摸謎 團」終極解開，不少網民對於真正患癌嘅Ed 師兄而非紋希（楊玉梅飾）均大感驚嘆。
《你好，我的大夫》逢周一至五晚 8 點半翡翠台播映