TVB歌唱真人騷《中年好聲音2》逢周日晚上9點翡翠台播出，節目由車婉婉擔任主持，肥媽、伍仲衡、張佳添、周國豐及陳慧嫻擔任評審。噚晚（8號）播出呢集係60強淘汰賽，60 強選手1對1 PK爭取晉級30強。噚晚淘汰賽緊張刺激，上回合嘅5燈選手李浩森、古淖文上演 5燈對決，率先上場嘅李浩森唱《Twist And Shout》，惟表現有所失準只獲3燈，卻獲伍仲衡大讚：「你有排玩呀！」
等待台下選手挑戰期間，古淖文突然舉手「下戰書」，引來嘩聲四起。惟以《摘星》應戰嘅淖文同樣表現失準只獲3燈，被批與浩森一 樣揀錯歌。由於兩人同分關係，晉級30強人選交由評審團投票決定，最終古淖文以4比1票數成功晉級，浩森被伍仲衡「燈走」，伍仲衡繼續力撐浩森： 「唔緊要，我搵你唱歌！」 
噚晚搶眼選手仲有陳俞霏，上回合豪奪5燈嘅佢獻唱《初戀》，貫徹Chill爆演出風格，最終冧莊五燈直接晉級30強！張佳添及周國豐直指睇得好Enjoy，惟伍仲衡略嫌陳俞霏情緒太Over：「Feel到你好開心，但feel唔到冧，嗰種Hyper有少少 over！」主持婉婉「質問」伍仲衡點解撳燈，伍仲衡爆笑回應：「咁佢係值得伍仲衡盞燈，咪拎5燈囉！」 
憑自帶強勁氣場被封為「大佬」嘅鍾晉生噚晚呢集登場，外表剛強、內裏溫柔，鍾晉生以招牌「重低音炮」獻唱《情人的眼淚》，唱到尾聲更眼泛淚光，大晒鐵漢柔情一面，最終佢以4燈揮低2燈嘅蔡京瞵。惟成功晉級後，「大佬」鍾晉生宣布退賽，將晉級名額讓畀其他選手，鍾晉生指每一位中年人都背負住好多包袱返去自己工作崗位，中年人有唔同目標抱負，而佢要為另外一個夢想繼續奮鬥。
《中年好聲音 2》周日晚9點翡翠台播映