TVB「大隻仔」關曜儁（Leo）去年初向圈外女友韻璇（Twinkle )求婚成功，未婚妻今年3月誕下女兒關凱妃，二人計劃10月27號舉行婚禮，今日流出多張結婚照，關曜儁笑指影結婚相對女性總係有股魔力，爆老婆為咗影輯靚相積極瘦身，今次帶埋女兒一齊影相。
關曜儁認為影婚照最大挑戰就係佢哋都係「硬照pose有限公司」，幸好攝影師捕捉到好多佢哋古靈精怪嘅動作，關曜儁又指一直好想着白色西裝，不過未搵到合適嘅場合，今次影結婚相終於可以試吓！
關曜儁記得一開始攝影師叫佢哋唔好笑，又叫太太要cool啲，關曜儁心諗：「我哋影相笑係最好睇㗎喎！」後來二人睇返影出嚟嘅效果又真係好OK，第二套就係影中式褂裝，佢同太太一齊攞道具即刻上咗身，擺出多個古靈精怪嘅甫士，關曜儁覺得呢一輯相有一份傳統得嚟又充滿玩味嘅感覺；呢輯攝影嘅最後一套衫亦係凱妃出場，關曜儁開心係女兒凱妃好配合，又笑又一齊cool，整個拍攝流程好順利。
