一代巨星哥哥張國榮（Leslie）逝世20週年，自今年3月29號起於香港文化博物館開「繼續寵愛・張國榮紀念展」，哥哥生前摯愛唐鶴德（唐唐）見證下，噚晚（9號 ) 踏入6點終於完成為期超過半年嘅展期，紀念展吸引總數共370,716 位市民及旅客入場參觀。
昨午12點前改掛三號風球，唔少市民及旅客冒住風雨，許冠傑太太亦把握最後機會到場觀賞紀念展，而哥迷亦得到印上「哥哥」親筆手稿嘅明信片作為留念。
陳淑芬（陳太）睇到哥哥離世20年後，仍有咁多哥迷一齊懷念哥哥，佢覺得好感動，今次紀念展嘅其中一個目的，就係希望將一眾哥迷聚埋一齊，令大家透過展館內嘅展品及影像重溫Leslie風采，呢日唐唐親身與哥迷見面，當唐唐出現喺展廳入口時，現場觀眾即發出歡呼聲，唐唐欣賞館內嘅所有展品，對現場哥迷要求合照或簽名等有求必應，佢更多謝大家對Leslie嘅愛及祝大家身體健康，哥同樣向佢送上祝福，笑住向唐唐反映要找一個更大嘅場地去舉辦下一次張國榮紀念展，去到閉館一刻，唐唐同現場哥迷感到非常依依不捨。
陳太感謝唐唐借出多件張國榮珍藏品作為今次紀念展展出之用，令展覽更具質量及意義；同時陳太感謝兩位客席策展人張叔平及夏永康，兩位美術大師將紀念展嘅美學水平提升至最高層次，令每位參觀人士也讚不絕口，多謝香港文化博物館鼎力支持，以及每位工作人員由籌劃、搭建、宣傳、展出，到閉幕一刻付出嘅大量心力，最要感謝哥迷同每位寵愛哥哥嘅人！「繼續寵愛・張國榮紀念展」劃上圓滿句號，但哥哥留畀大家嘅愛仍在人間，從未遠離。