幾位君子嘅個人發展繼續牽動住《你好，我的大夫》嘅結局，星期二晚一集，劇情焦點就落喺 吳偉豪 身上，劇情講述歡喜冤家路遠志( 吳偉豪 飾)同袁絲絲( 陳嘉慧 飾)，一個因為要繼承爺爺嫲嫲嘅路林醫館而壓力爆煲、另一個就因被同期嘅「糖EC」( 游嘉欣 飾)比下去而大感冇癮。
失意嘅佢哋借酒澆愁後意外同床；雖未有發生關係，但被赤裸上身嘅遠志嚇傻嘅絲絲，鬧爆對方之餘又大力踢向佢要害，呢對水溝油笑料唔停嘅「遠絲CP」後續發展會繼續一波多折，遠志因講錯一句說話激嬲絲絲慘被兜巴星，之後遠志重複犯錯仲同糖EC酒後同床，又被絲絲人贓並獲，搞到關係再成水火。
遠志為氹返絲絲使盡渾身解數，最終成功力挽狂瀾仲同絲絲甜蜜擁吻，呢次更係Erica結婚封盤前最後螢幕之吻。
被封為「喜感擔當」嘅Ricco，無論係呢集同床戲，定係之後嘅親吻場面都係半裸上陣，不止腹肌若隱若現，胸肌完美線條亦相當吸引。Ricco受訪時就認拍攝前為場面做運動喇：「我自己就覺得唔Fit，但嗰段時間係有keep吓，因為開工唔算好密，所以都會做運動，最鍾意打波同滑浪，反而冇特別做gym操大隻，因為我覺得個劇情話路遠志壓力大，瘦削啲反而啱返個劇情。」
至於佢同Erica嘅親密場面，Ricco話開拍前已有心理準備，所以拍攝時未會特別尷尬，反而 集中同Erica討論點樣令畫面更精彩：「我自己鍾意加加減減，唔知出嚟大家睇唔睇得出有啲咩係我設計落去，呢個真係要考觀眾眼力喇。」
觀眾對遠志同爺爺路醫師( 大AL 飾)學醫時被鬧到狗血淋頭亦相當不值，仲對遠志默默忍受大感佩服。 而Erica嘅演技亦備受讚賞，面對「糖EC」從後趕上超越自己，絲絲雖然難受，不過仍不忘替好友高興，咁矛盾嘅心情下，飲醉嘅絲絲向遠志訴苦時又喊又笑，甚具感染力。
《你好，我的大夫》結局篇 星期一至五晚 20:30 翡翠台