由綽號「廚壇魔術師」 楊尚友 主持；一連15集結合旅遊同煮食嘅全新節目《Christian In Paris》聽晚首播。Christian今次一家4口走訪巴黎，由美食出發，同大家Share旅遊、享樂同親子好去處，以「食盡最正美食， 睇盡巴黎最靚美景」為目標。
Christian每集都會喺自家廚房重現品嚐過嘅法式美食，等大家都可以變法國菜廚神。 法籍嘅 Christian曾喺當地旅居逾10年，講得一口流利法語之外仲娶咗擁法國血統嘅太太Judith，又可以煮出變幻無窮嘅法式美食，堪稱「法國達人」。
今次Christian就會同太太、囡囡Amberlie仲有囝囝Bradley返「鄉下」巴黎，尋訪自己兒時吃喝玩樂嘅腳印。既係親子遊，同時尋訪名人足跡，探索巴黎好食好玩地方。
星期一播出嘅首集，Christian一落機，就埋仔女幫襯有過百年歷史嘅Terminus Nord餐廳，佢仲話︰「喺法國想食嘅嘢，呢度都食到。仲要坐返呢張細路仔時，同舅父成日坐嘅枱。」Christian嘅子女首次到訪法國，不過初嚐生蠔就兩個極端喇。
佢哋又會去租電船自駕遊，每小時只需花費400港元，就可以暢遊聖馬丁運河，欣賞沿岸景色，太太Judith猛讚好玩。上岸後再去公園玩法式滾球，一家4口比拼。第三集由一對子女自己話事，佢哋指名要到杜樂麗花園玩機動遊戲，由摩天輪到撞到散嘅碰碰車遊戲都玩齊，大人小朋友都非常盡興。
Christian又會帶大家喺當地尋找明星足跡，聽晚介紹嘅米芝蓮越南餐廳Phở Tài，劉嘉玲、甄子丹同呂良偉等藝人都曾慕名到訪。Christian一家四口就試齊必食嘅牛肉河粉、 沙茶牛肉河粉同春卷，老闆鄭先生仲誠意推介特製牛骨湯，一家4口享受明星級待遇。
而星期二晚一集，Christian會孤隻身到里昂火車站二樓嘅Le Train Bleu餐廳，僅以600多港元價錢品嚐法國fine dining，由頭盤到甜品都令佢讚不絕口。呢間開業超過120年嘅餐廳，由1901開始營業，主打金、藍兩色古味盎然，難怪周杰倫嘅《最偉大的作品》 MV都揀呢度取景拍攝喇。
Christian之後又會接連品嚐Ladurée嘅馬卡龍、Fluffy’s嘅正宗法蘭西多士、Crêpe Avenue嘅法式蕎麥可麗餅，又會跟專家學習品嚐魚子醬。Christian更會教大家重現Rum Baba甜品、法式焗龍蝦、法式干邑嫩煎牛仔肉、法式嫩煎魚扒同法式蕎麥可麗餅嘅製法，讓觀眾安坐家中學整法國菜。
《Christian In Paris》星期一至五晚 22:30 J2